Shved tiliniń sózdigi 2800 jańa sózben tolyqty

ASTANA. KAZINFORM — 11 jyldyq úzilisten keıin Shved akademııasy shved tiliniń Orfografııalyq sózdiginiń (SAOL) 15-basylymyn jaryqqa shyǵardy, dep habarlaıdy AZERTADJ.

Jańartylǵan nusqadan shamamen 1500 sóz alynyp tastalyp, onyń ornyna tildegi qazirgi ózgeristerdi kórsetetin 2800 jańa sóz engizilgen. Bul ózgerister, eń aldymen, tsıfrlyq mádenıet, áleýmettik jeliler jáne qoǵamdyq úderisterdiń yqpalymen baılanysty. Jańa sózderdiń qatarynda ınternetke, tehnologııaǵa, ekologııaǵa, jeke bolmysqa jáne ómir saltynyń ózgerýine qatysty termınder bar. Mysaly: webbinarium (vebınar), avfölja (jazylýdan bas tartý), cykelpendla (jumysqa velosıpedpen qatynaý), QR-kod.

Sózdiktiń bas redaktory Lýıza Holmerdiń aıtýynsha, SAOL-ǵa jaı ǵana qazirgi neologızmder emes, qoǵamda keńinen qoldanysqa engen, eldiń túrli aımaqtarynda turaqty paıdalanylatyn sózder ǵana engiziledi. Redaktsııa tar aıada qoldanylatyn termınderden, dıalektiler men slengten ádeıi bas tartyp, qazirgi ádebı tildi kórsetýge umtylady.

Sonymen qatar sózdikten eskirgen nemese áleýmettik turǵyda sezimtal sanalatyn, búgingi kúni daýly qabyldanýy múmkin keıbir ataýlar alynyp tastalǵan.

Saıası salada da belgili bir kezeńge ǵana tán, bılik aýysýyna baılanysty mańyzyn joǵaltatyn sózder kezdesedi. Mundaı sózder bir ýaqytta oryndy bolǵanymen, 5 jyldan keıin orynsyz dep sanalýy múmkin.

Aldaǵy ýaqytta Shved akademııasy sózdikti tsıfrlyq formatta jıi jańartyp otyrýdy josparlap otyr. Lýıza Holmerdiń aıtýynsha, tilmen jumys — úzdiksiz júretin protsess.

Budan buryn Shvetsııa azamattyq syrtqy barlaý qyzmetin qurýdy josparlap otyrǵany belgili boldy.