Shvetsııanyń birqatar qalasynda birneshe kúnnen beri tártipsizdikter bolyp jatyr

BRıÝSSELЬ. QazAqparat - Shvetsııanyń birqatar qalasynda, Pasha merekesi kezinde ýltraońshyl toptyń arandatýshylyq áreketine baılanysty tártipsizdikter oryn aldy, dep habarlaıdy QazAqparat.

Shvetsııanyń Lınchepıng, Norchepıng, Stokgolm, Erebrý, Malme jáne Landskron qalalarynda tórtinshi kún qatarynan qaqtyǵystar bolyp jatyr. Tártipsizdik ımmıgranttarǵa qarsy «Stram Kurs» («Qatań kýrs») partııasyn basqaratyn ýltraońshyl saıasatker Rasmýs Palýdannyń juma kúni musylmandardyń qasıetti Quran kitabyn kópshilik aldynda órtep jiberip, bul áreketin Shvetsııanyń basqa qalalarynda qaıtalaıtynyn aıtqan soń bastaldy.

Shvetsııa polıtsııasynyń habarlaýynsha, «Stram Kurs»-tyń 100-ge jýyq qarsylasy polıtsııa qyzmetkerlerine tas laqtyryp, kólikterdi, dóńgelekterdi jáne qoqys jáshikterin órtegen. Tártipsizdikter kezinde 16 polıtseı jaraqattanyp, 25 adam ustaldy.

Jeksenbi kúni saǵat 23.00-de polıtsııa Malme qalasy aýdandarynyń birinde ótken narazylyq sherýlerin taǵy da taratýǵa májbúr boldy. Birneshe jerden órt shyǵyp, polıtsııa qyzmetkerlerine tas laqtyrylyp, petardalar men otshashýlar atyldy.

«Biz muny zorlyq-zombylyq kórsetilgen kóterilis dep sıpattaımyz», - dedi polıtsııa ókili Patrık Fors.

Osy arada, Shvetsııadaǵy tolqýlar halyqaralyq narazylyq týdyrdy. Jergilikti Expressen gazeti Irak Syrtqy ister mınıstrliginiń oqıǵaǵa baılanysty Shvetsııanyń Baǵdadtaǵy elshisin shaqyrtqanyn jazdy. Irak bolǵan oqıǵanyń «aýyr zardaptary bolýy múmkin» ekenin málimdedi.