«Shvetsııaǵa «qydyryp» barǵan sheneýnik kim?» - BAQ-qa sholý
***
«Egemen Qazaqstan» basylymynyń jazýynsha, Jáýtikov olımpıadasynyń úzdikteri Nazarbaev Ýnıversıteti granttaryna ıe boldy. Bul kúnde Halyqaralyq Jáýtikov olımpıadasyn qazaqstandyq bilim brendine aınaldy dep aıtýǵa tolyq negiz bar. Bıyl toǵyzynshy ret alys jáne jaqyn shetelderdiń matematıka, fızıka jáne ınformatıka pánderine qabiletti jetkinshekterin jınap, jeńimpazdaryn anyqtap bergen olımpıada tanymaldylyq tuǵyryna turaqtady. Aınalamyzdaǵy elderdiń esepke júırik balalary Qazaqstanda ótetin Jáýtikov olımpıadasyn biledi. Mamandandyrylǵan basylymdar saıttarynda jarııalanatyn osy olımpıadanyń tapsyrmalaryn óz betterinshe oryndaıdy, qatysýdy kókseıdi. Bul esepter kúrdeliligi jaǵynan Dúnıejúzilik matematıka olımpıadasynan bir mysqal da kem emestigin moıyndaıdy. Eger bul kúnde atalmysh olımpıadaǵa qatysatyn memleketterdiń qatary shekteýli bolsa, oǵan tek qarjy máselesi qolbaılaý bolyp otyr dep túsiný qajet. Sońǵy saıysta synǵa túsken 13 eldiń balalary Jáýtikov olımpıadasynyń tapsyrmalary bıyl da qyzyq ári kúrdeli bolǵandyǵyn bir aýyzdan atap ótti.
«Keshe Premer-Mınıstr Serik Ahmetov Eýrazııalyq ekonomıkalyq komıssııasynyń energetıka jáne ınfraqurylym boıynsha kollegııasynyń múshesi (mınıstr) Danıal Ahmetovti qabyldady», dep jazady «Egemen Qazaqstan» «Integratsııa máselesi sóz boldy» atty materıalda.
Áńgime barysynda D.Ahmetov Eýrazııalyq ekonomıkalyq komıssııasynyń jumys barysy, onyń aǵymdaǵy jáne bolashaqtaǵy jumys josparlary týraly habarlady.
«Prezıdentterdiń tapsyrmalaryna sáıkes biz ústimizdegi jyldyń 1 mamyryna deıin Komıssııanyń perspektıvalyq jumys josparlaryn jasaýǵa tıispiz. Sonymen qatar, men Premer-Mınıstrge normatıvtik-quqyqtyq bazany júıelep, jınaqtaý boıynsha, bizdiń Komıssııamyzdyń sheńberinde qandaı jańa qujattar daıyndalyp jatqany týraly, jýyq arada ıntegratsııanyń qandaı jańa baǵyttaryn engizýdi josparlap otyrǵanymyzdy baıandadym», - dedi kezdesý qorytyndysy boıynsha D.Ahmetov.
***
«Alash aınasy» gazetindegi «Búırekten sıraq shyǵarmaıtyn» Zań kerek!» degen maqalada «búırek satamyn» degen jarnamalarmen donor izdep, jasyryn bıznes kózi jasalýy qaýpi týraly aıtylady. Búgingi tańda elimizde búırek almastyrýdy qajet etetin naýqastar sany 2 myńnan asqan. Jáne olardyń qatary kún sanap artyp keledi. Al donor tapshylyǵy máselesiniń qazirge sheshim tabatyn túri joq. Bizdegi qazirgi zań boıynsha jol-kólik oqıǵasynan nemese basqa da jaǵdaıda jaraqat alǵan, ólim aýzyndaǵy jandardyń organdaryn týystarynyń ruqsatymen alyp, paıdalanýǵa bolady. Biraq, ókinishke qaraı, bizdiń elde mundaı birde bir jaǵdaı tirkelmegen. Óıtkeni bizdiń halyqtyń mentalıteti, nanym-senimi ólim aýzynda jatqan týysynyń organyn paıdalanýǵa kelisimderin berýge kedergi keltirip otyr. Búgingi tańda elimizde jasalyp jatqan búırek almastyrý otasynda donor bolǵandar - tek naýqastardyń eń jaqyn týystary ǵana. Al dárigerler bolsa «týystarynyń ruqsatynsyz biz ólim aýzynda jatqan adamnyń organyn alyp, basqa bireýge sala almaımyz, erteńgi kúni ústimizden aryz túsip, sotqa súırep, basymyz pálege qalýy múmkin» deıdi. Sondyqtan da dárigerler «donor máselesiniń túıinin sheshetin zań qajet» deıdi. Óıtkeni búgingi zań nátıje bermeı otyr. Esesine «búırek satam» deýshilerdiń qatary kóbeıip keledi. Búıregin aqshaǵa satyp múgedek bolyp jatsa, oǵan bizdiń el erteń járdemaqy tóleýi kerek.
Osy basylymdaǵy «Oı-kókpar» aıdarynda «Álemdik tájirıbege saı aýqattylarǵa salynatyn salyq salmaǵyn arttyrý kerek pe?» degen másele qozǵaldy. Jalpy, buǵan qatysty sarapshylardyń zertteýlerine súıensek, bizde áleýmettik júıe tıimdi qalyptaspaǵan. Keńes ókimetiniń bir jaqsy jeri olar aýqattylarǵa baqylaý qoıa bildi. Al qazir mundaı tásil joq. Ekonomıka ǵylymynyń doktory, professor Serikbolsyn Ábdildın: «Men osydan biraz ýaqyt buryn AQSh-ta boldym. Sol elde gaýhartas satý bıznesimen aınalysatyn kásip ıeleri memleket qazynasyna túsken tabystyń 70 paıyzyn salyq esebinde tóleıtinin kórip, bilip tańǵaldym. Sol sátte «bizdiń elde naq osyndaı júıe qoldanysqa ense qalaı bolar eken?!» dep oılandym.
***
«El basshylyǵynyń qurylǵanyna kóp ýaqyt bolmaǵan Qurylys jáne TKSh agenttigin aqyry nege taratyp tynǵandyǵy málim bola bastady. Ondaǵy sheneýnikter eskiden salynǵan soqpaqpen salyp uryp, júre berýge jaman úırenip, jasampazdyq tanytqysy, jańa men ozyqty úırengisi kelmegenge uqsaıdy. Úkimettiń keshegi otyrysynda Premer-Mınıstr Serik Ahmetov «úzdik sheteldik tájirıbelerdi úıren, elde endir» dep jibergen memlekettik qyzmetkerlerdiń Otanǵa oralǵan soń, túk bitirmeıtindigine ashyndy»,-dep jazady «Aıqyn» basylymy búgingi sanynda. Bul maqala «Shvetsııaǵa «qydyryp» barǵan sheneýnik kim» degen taqyryppen berilip otyr.
