Shujyq kesetin pyshaq sómkede júrgen: sotta áýejaıdaǵy oqıǵaǵa qatysty tyń derekter aıtyldy
ALMATY. KAZINFORM — Almaty áýejaıynda qyzmetkerdi kepilge alǵan er adamǵa qatysty sot otyrysy bastaldy.
Sot otyrysy Túrksib aýdandyq sotynda ótip jatyr. Kúdiktige qatysty qylmystyq kodekstiń úsh baby boıynsha aıyp taǵylyp otyr:
Kepilge alý — QR QK-niń 261-baby 2-bóligi 4-tarmaǵy;
Qarý qoldaný arqyly jasalǵan buzaqylyq — QR QK-niń 293-baby 3-bóligi;
Terrorızm aktisi týraly kórineý jalǵan habarlaý — QR QK-niń 273-baby.
Aldyn ala tyńdaý kezinde prokýror aıyptaý aktisin oqydy. Іs materıaldaryna sáıkes, 2025 jyldyń 7 naýryzynda jumyssyzdyq pen jınalǵan qaryzdaryna baılanysty aýyr ómirlik jaǵdaıǵa tap bolǵan M.Baratov Almaty halyqaralyq áýejaıyna avtobýspen kelgen. Áýejaı aýmaǵynda biraz júrip, saǵat 11:00 shamasynda ǵımaratqa kirgen jáne ekinshi qabatqa kóterilip, jolaýshylardy tirkeý zalyna ótken.
— Baratov jolaýshylardyń ushýǵa deıingi tekserýden ótip, kútý zalyna kirip jatqanyn kórgen. Sóıtip ózi de basqa qalaǵa usha alamyn dep oılap, jolaýshylarmen birge tekserý beketine barǵan. Sol jerde ony tekserý qyzmetiniń ınspektory Muhtarova (jábirlenýshi) toqtatyp, ári qaraı ótý úshin otyrǵyzý talony men jeke kýáligin kórsetýin suraǵan, — dedi prokýror.
Іs materıaldarynan belgili bolǵandaı, Baratov ózinde eshqandaı qajetti qujat joq ekenin túsinip, tekserýshi ınspektordy kepilge alǵan. Ol bul áreketi arqyly áýejaı qyzmetkerlerin ózin ushaqqa otyrǵyzýǵa májbúrlemek bolǵan.
— Tekserý qyzmetiniń ınspektory Muhtarovany shashynan tartyp, qoǵamdyq tártipti buzdy. Oń jaq qaltasynan pyshaq alyp shyǵyp, onymen qorqytty. Bul áreketimen shektelmeı, polıtsııa qyzmetkerleri men basqa adamdardyń jınalyp jatqanyn kórip, Baratov ınspektordy ózine «qalqan» etip paıdalandy. Pyshaqty onyń tamaǵyna taqaǵan kúıi talap qoıdy: ózine jaqyndamaý, kúsh qoldanbaý jáne qarýdy tastaý. Eger bul talaptar oryndalmasa, áýejaı ǵımaratyn jaryp jiberetinin aıtty, — dedi prokýror.
Aıyptalýshy Mashrapbek Baratov oqıǵaǵa baılanysty óz nusqasyn aıtyp berdi. Onyń sózinshe, ol áýejaıǵa barýdy aldyn ala josparlamaǵan. Qoǵamdyq kólikte otyryp áýe aılaǵyna qalaı jetkenin baıqamaı qalǵan.
Aıyptalýshy tekserý beketine barǵanda ınspektor ózinen qujat suraǵanyn, al ketpek bolǵanynda ózin jaǵadan tartqanyn atap ótti. Aıtýynsha, ol ashý ústinde qyzdy shashynan tartqan jáne kúndelikti sómkesinde shujyq kesý úshin alyp júretin pyshaqty alyp shyqqan.
Mashrapbek Baratov abyr-sabyr ústinde «áýejaıdy jaramyn» dep aıtqanyn moıyndady. Biraq aıtýynsha, eshkimge zııan keltirýge ne áýejaıdy jarýǵa nıeti bolmaǵan.
Eske salaıyq, 7 naýryz kúni Almaty áýejaıynda er adam qyzdy kepilge alyp, kópshilik aldynda pyshaq kezengenin jazǵanbyz.
Abyroı bolǵanda, oqıǵa qaıǵyly aıaqtalmady. Musa Ábdiraıym kúdiktige ózin kepilge usynyp, qyzmetkerdiń ornyna turǵan. Er adam tártip saqshylarymen kelissózge alańdaǵan tusta ol kúdiktiniń qolyndaǵy pyshaqty julyp aldy.
Buǵan deıin Almaty áýejaıynda qyzdy kepilge alǵan kúdiktige qatysty sot bastalatynyn jazǵanbyz.