Şýchınskide áleýmettik osal top ókilderine 40 páterdiń kilti tabystaldy
ASTANA. KAZINFORM - Şýchınskide áleýmettik osal top ókilderine 40 páterdiń kiltin tabystaý rásimi ótti, dep habarlaıdy Aqmola oblysy ákimdiginiń baspasóz qyzmeti.
Tsıalkovskıı kóshesi, 13 úı mekenjaıynda ornalasqan 8 páterli turǵyn úı 1924 jyly salynǵan. Eskirgen ǵımarattyń menshik ıeleri 2022 jyldyń qyrkúıeginde Býrabaı aýdanynyń ákimdigine júginip, baspananyń apatty jaǵdaıda ekenin málimdedi.
Saraptama júrgizilgennen keıin, 2023 jylǵy ǵımarat apatty dep tanylyp, ol buzylatyn boldy.
Jergilikti atqarýshy organdar apatty úıdi renovatsııa baǵdarlamasyna engizý týraly sheshim qabyldady. Burynǵy turǵyndar baspanalaryn «Tasu Company» JShS qurylys kompanııasyna bosatyp berdi. Osylaısha, joba bıýdjet qarajatyn tartpaı, tek jeke ınvestıtsııalar esebinen júzege asyryldy. Merdiger kompanııa eski ǵımarattyń ornyna 48 páterden turatyn zamanaýı 6 qabatty turǵyn úı keshenin saldy.
Aıta keteıik, bul úı – Memleket basshysynyń tapsyrmasymen júzege asyrylyp jatqan renovatsııa baǵdarlamasy aıasynda Aqmola oblysynda salynǵan alǵashqy turǵyn úı.
Jańa úıdiń salynýy azamattardyń ómir súrý jaǵdaıyn jaqsartýmen qatar, qala kelbetin ózgertip, qosymsha ınjenerlik ınfraqurylym salý qajettiliginsiz qalany jańartýǵa múmkindik beredi.
Eski páterler jańa, keń ári jaıly baspanaǵa aýystyryldy. Burynǵy turǵyndardyń barlyǵy jańa turǵyn úı kesheninen tóbesi btıik, jaryq dálizderi bar zamanaýı páterlerge ıe boldy. Sondaı-aq, úıde lıft ornatylǵan, bul turǵyndardyń ómir súrý sapasyn aıtarlyqtaı arttyrady. Keshen barlyq qajetti jaǵdaılarmen qamtylǵan jáne jaıly ómir súrýge tolyq múmkindik beredi.
Qalǵan 40 páterdi Býrabaı aýdanynyń ákimdigi satyp alyp, áleýmettik osal toptaǵy ondaǵan azamatty baspanamen qamtamasyz etti.
Aqmola oblysynyń ákimi Marat Ahmetjanov jańa turǵyndarǵa kilt tapsyrý barysynda mundaı baǵdarlamalardyń halyqtyń ómir súrý sapasyn jaqsartýdaǵy mańyzdylyǵyn atap ótti. Ol renovatsııa tek apatty úıler máselesin sheship qana qoımaı, sonymen birge halyq úshin qolaıly ári zamanaýı jaǵdaılar jasaýǵa baǵyttalǵan mańyzdy qadam ekenin aıtty.
«Memleket basshysy eń aldymen qazaqstandyqtardyń ómir súrý sapasyn arttyrýǵa baǵyttalǵan áleýmettik jobalardy júzege asyrýǵa erekshe nazar aýdarady. Solardyń biri – turǵyn úı men qamtamasyz etý máselesi. Ótken jyly bıýdjet qarajaty esebinen 28 turǵyn úı salynyp, 850 páter satyp alyndy. Nátıjesinde shamamen 2,5 myń otbasynyń turǵyn úı jaǵdaıy jaqsardy. Olardyń 1,5 myńy – áleýmettik osal toptardaǵy otbasylar. Jalpy, oblys boıynsha 6 myńnan astam aqmolalyq jańa, jaıly baspanaǵa ıe boldy. Daıyn páterlerdi satyp alý arqyly turǵyn úı kezegin azaıtýǵa múmkindik týdy. Buǵan qosa, bul turǵyn úıler bıýdjet esebinen salynǵan baspanalarǵa qaraǵanda áldeqaıda sapaly. Bul shara kópbalaly otbasylardyń, jetim balalardyń, múgedektigi bar azamattardyń jáne basqa da áleýmettik osal sanattaǵy adamdardyń turǵyn úı jaǵdaıyn jaqsartýǵa múmkindik beredi», – dedi M.Ahmetjanov.
Jańa úıden páter alǵan kópbalaly ana Elına Shmıdt óz qýanyshyn jasyra almaı:
«Turǵyn úı-kommýnaldyq sharýashylyq qyzmetkerleri qońyraý shalyp, bizge páter beriletinin aıtqanda senbedim. Alǵashynda alaıaqtar dep oılap, ákimdikke habarlastym. Olar maǵan óz qyzmetkeri baılanysqa shyqqanyn rastady jáne qujattardy tapsyrýǵa bolatynyn aıtty. Sol kezde jylap jiberdim. Biz 14 jyl kúttik, endi eshqashanúı ala almaıtyn shyǵarmyz dep oıladyq. Páterdi kórgen kezde taǵy da jyladyq – óıtkeni bul bizdiń baspanamyz! Óte ádemi, mundaı jaqsy jóndeýdi kútken joqpyn. Osyndaı baǵdarlama úshin memleketimizge alǵysymyz sheksiz. Biz óte baqyttymyz!» – dedi E.Shmıdt.
Býrabaı aýdanynda renovatsııa baǵdarlamasyn iske asyrý – óńirdegi turǵyn úı jaǵdaıyn jaqsartýǵa jasalǵan mańyzdy qadam. Sonymen qatar, bul zamanaýı qurylys pen halyqtyń qajettilikterine degen qamqorlyqtyń úılesimdi úlgisi bolyp tabylady.
Bul baǵdarlama óńirdiń basqa qalalaryn da qamtıdy. Atap aıtqanda, Kókshetaý qalasynda osy bastama aıasynda jańa turǵyn úı qurylysy bastaldy.