Şýchede joldyń boıynan 27 jastaǵy áıeldiń denesi tabyldy
KÓKShETAÝ. KAZINFORM - Şýche qalasynda joldyń boıynda 27 jastaǵy áıeldiń denesi tabyldy.
Áleýmettik jelide jarııalanǵan jazbada Şýche qalasynyń «Baldáýren» oqý-saýyqtyrý ortalyǵy baǵytyndaǵy joldyń boıyndaǵy shlagbaým mańynda áıel adamnyń denesi tabylǵany aıtylady.
«Bıylǵy 11 naýryzda Şýche qalasynda 1997 jyly týǵan áıeldiń denesi tabyldy. Máıitti alǵashqy tekserý kezinde qandaı da bir dene jaraqaty anyqtalǵan joq, sot-medıtsınalyq saraptama taǵaıyndaldy, saraptama qorytyndysy boıynsha túpkilikti protsessýaldy sheshim qabyldanatyn bolady. Aldyn ala anyqtalǵandaı, ólimge denesiniń qatty tońýy sebep bolǵan», - dep túsindirdi Kazinform tilshisiniń saýalyna Aqmola oblysy PD baspasóz qyzmetinen.
Aıta ketsek, budan buryn Aqmola oblysynda kóliktiń ishinen eki adamnyń denesi tabylǵanyn jazǵan edik.
