«Shrektegi» esek týraly jeke mýltfılm túsiriledi

ASTANA. KAZINFORM —  «Shrek» mýltfılmindegi esek týraly jeke anımatsııalyq fılm túsirilmek. Bul jaıynda Screen Rant basylymyna akter Eddı Merfı málimdedi.

Eddı Merfı — «Shrek» franshızasynyń barlyq bóliminde esek keıipkerin dybystaǵan akter.

Onyń aıtýynsha, akterler qazir «Shrek 5» mýltfılmin dybystaý ústinde, alaıda jaqyn arada esek týraly spın-off jobasyna kirispek.

— Qyrkúıekte esek týraly mýltfılmge qatysty jumysty bastaımyz. Bul shamamen úsh jylǵa sozylady. Al «Shrek 5» jobasymen eki jyldan beri aınalysyp kelemiz, — dedi Merfı.

Akter bul jobanyń «Saptaǵy mysyq» mýltfılmine uqsaıtynyn aıtyp ótti:

— Bul jeke esek týraly mýltfılm bolady. Onda onyń aıdahar áıeli men jartylaı aıdahar, jartylaı esek balalary týraly shaǵyn oqıǵa qamtylady, — dedi ol.

Qazirgi tańda Merfı kópshilik asyǵa kútken «Shrek 5» mýltfılmin dybystaý jumystarymen aınalysyp jatyr. Onyń treıleri 2025 jylǵy aqpanda jaryq kórgen bolatyn.

Aıta keteıik, esek — «Shrek» franshızasynyń basty keıipkerleriniń biri, biraq buǵan deıin ol týraly jeke fılm túsirilmegen. Al mysyq — franshızadaǵy basqa keıipker — eki jeke spın-offqa ıe boldy. Onyń alǵashqy fılmi 2011 jyly jaryqqa shyǵyp, álemdik prokatta 555 mıllıon dollarǵa jýyq tabys tapqan.

Eske salsaq, 2002 jyly «Shrek» tolyqmetrajdy anımatsııalyq fılm retinde «Oskar» júldesin alǵash jeńip alǵan týyndy bolǵan. 2001 jyldan 2010 jylǵa deıin franshıza aıasynda tórt tolyqmetrajdy mýltfılm jaryq kórdi.

Buǵan deıin balalarǵa qarjylyq saýattylyqty úıretetin jańa mýltfılm jaryq kórgenin jazǵan edik.