Shopogolızm — terapııa emes: mamandar artyq saýda jasaýdyń qarjylyq saldaryn atady
ASTANA. KAZINFORM — Búgin — halyqaralyq shopıng kúni. Dúnıe júzi boıynsha 11.11 jeńildikteri men bólip tóleý naýqandary júrip jatyr. «Búgin LIVE» baǵdarlamasynda sarapshylar bul aktsııalardyń artynda ne turǵanyn túsindirdi.
MNU aǵa oqytýshysy, psıholog Ásel Ihsanova shopogolızmniń psıhologııalyq negizin tarqatty.
— Adam ózin izdegende shopogolızmge ushyraıdy. Bul ádet adamnyń ishki turaqsyzdyǵy men ózin tómen sanaýynan týyndaıdy. Zat satyp alý arqyly adam óziniń ereksheligin kórsetemin dep oılaıdy, biraq bul ishki jáne qarjylyq turaqsyzdyqqa ákelýi múmkin, — deıdi maman.
Zertteýlerge sáıkes, 800 áıeldiń shamamen 74 paıyzy ár mınýt saıyn kıim satyp alý týraly oılaıdy. Bul oraıda psıholog marketıng qurbany bolmaýǵa keńes berdi.
— Psıhologııaǵa qatysy joq psevdopsıhologtar «kıim satyp al, ózińdi qýant, bul — terapııa» degen jobada shabyt taratady. Alaıda adam birinshi kezekte ózin oılap, marketıng qurbanyna aınalmaý kerek, — deıdi psıholog.
Bul oıdy qarjy mamany Ǵımran Ábdrahmanov ta quptaıdy.
— Túrli jeńildik aktsııalary qoımalardy bosatý jáne tutynýshylardy shyǵynǵa batyrý maqsatynda júrgiziledi. Sondyqtan bólip tóleýge eliktep, qajetsiz taýarǵa aqsha jumsaýǵa bolmaıdy. Bul jerde banktiń de, dúkenniń de paıdasy bar ekenin esten shyǵarmaý kerek. Mysaly, 10 myń teńge turatyn taýardy 5 myńǵa satamyz deıdi. Oǵan tipti merzim de belgilep qoıady, «2 saǵat, 1 kúnińiz ǵana qaldy» dep. Sol sátte emotsııaǵa erik bermeı, josparlaǵan bıýdjetke qarap zat satyp alǵan durys, — deıdi ekonomıst.
Onyń aıtýynsha, bólip tóleý mehanızmin tek qajetti zattarǵa qoldanǵan durys.
— Mysaly, kompıýterdi 24 aıǵa satyp alýǵa bolady, sebebi ol jumys isteýge, tabys tabýǵa kómektesedi, — deıdi qarjyger.
Aıta keteıik, buǵan deıin qarjyger aqshany qalaı únemdeý keregin aıtqan bolatyn.