Shildede álemde azyq-túlik baǵasy ósti
ASTANA. KAZINFORM - Birikken Ulttar Uıymy Azyq-túlik jáne aýyl sharýashylyǵy uıymynyń málimetteri boıynsha, ótken aıda azyq-túlik baǵasy ósti.
Azyq-túlik jáne aýyl sharýashylyǵy uıymynyń baǵa ındeksi shildede 130,1 pýnktke jetti, bul maýsymdaǵy kórsetkishten 1,6 paıyzǵa joǵary. Bul álemde et pen ósimdik maıyna degen baǵanyń ósýimen baılanysty.
Azyq-túlik jáne aýyl sharýashylyǵy uıymy ókilderiniń habarlaýynsha, azyq-túlik baǵalarynyń ındeksi 2022 jyldyń sharyqtaý shegine jetken kezden 18,8 paıyzǵa tómen. Alaıda ol 2024 jylǵy kórsetkishten 7,6 paıyzǵa joǵary bolyp otyr.
Dándi daqyldar
Dándi-daqyldar baǵasynyń ındeksi orta eseppen 106,5 pýnktti qurady, bul maýsym aıymen salystyrǵanda 0,8 paıyzǵa tómen. Bıdaı men sorgo baǵasynyń tómendeýi júgeri men arpa baǵasynyń ósýinen basym boldy. Soltústik jartyshardaǵy maýsymdyq bıdaı jınaý naýqany da baǵanyń tómendeýine yqpal etti.
Kúrishtiń barlyq túrleri baǵasynyń ındeksi 1,8 paıyzǵa tómendedi, bul iri kólemdegi eksporttyq jetkizilimder men álsiz ımporttyq suranysqa baılanysty boldy.
Ósimdik maıy
Shilde aıynda ósimdik maılary baǵasynyń ındeksi orta eseppen 166,8 pýnktti qurap, sońǵy úsh jyldaǵy eń joǵary deńgeıge jetti. Bul aldyńǵy aımen salystyrǵanda 7,1 paıyzǵa joǵary. Kórsetkishtiń ósýine palma, soıa jáne kúnbaǵys maılarynyń qymbattaýy sebep boldy.
Palma maıynyń baǵasy álemdik joǵary suranys pen básekege qabilettiliktiń artýy aıasynda kóterildi, al soıa maıynyń baǵasy Soltústik jáne Ońtústik Amerıkadaǵy bıootyn salasynyń turaqty suranysy týraly boljamdardyń arqasynda ósti.
Kúnbaǵys maıynyń qymbattaýy Qara teńiz aımaǵyndaǵy eksporttyq jetkizilimderdiń qysqarýymen baılanysty boldy. Al raps maıy, kerisinshe, Eýropadaǵy mol ónimge baılanysty arzandady.
Et ónimderi
Et baǵasynyń ındeksi orta eseppen 127,3 pýnktti qurap, jańa rekordtyq deńgeıge jetti. Bul kórsetkish maýsym aıymen salystyrǵanda 1,2 paıyzǵa joǵary. Ósim sıyr jáne qoı eti baǵasynyń qymbattaýymen baılanysty boldy, oǵan joǵary ımporttyq suranys, ásirese Qytaı men AQSh tarapynan, áser etti.
Qus eti baǵasy da sál ósti, bul Brazılııanyń qus tumaýynan taza el mártebesin qaıta alýymen baılanysty. Al shoshqa etiniń baǵasy, kerisinshe, usynystyń artýyna baılanysty tómendedi.
Sút ónimderi
Shilde aıynda sút ónimderi baǵasynyń ındeksi maýsym aıymen salystyrǵanda 0,1 paıyzǵa tómendep, 155,3 pýnktti qurady. Sary maı men qurǵaq sút baǵasy iri kólemdegi eksporttyq jetkizilimder men álsiz ımporttyq suranysqa baılanysty tómendedi. Alaıda álemdik naryqta irimshik baǵasy Azııa jáne Taıaý Shyǵys naryqtaryndaǵy joǵary suranys pen Eýropalyq Odaqtaǵy eksporttyq usynystyń qysqarýyna baılanysty óse berdi.
Qant
Qant baǵasynyń ındeksi orta eseppen 103,3 pýnktti qurap, aldyńǵy aımen salystyrǵanda 0,2 paıyzǵa tómendedi. Baǵaǵa qysym 2025–2026 jyldary qanttyń álemdik óndirisiniń qalpyna keletini týraly boljamdarmen, ásirese Brazılııa, Úndistan jáne Taılandta, baılanysty boldy.
Osyǵan deıin elimizde azyq-túlik vaýcheri pılottyq jobasy iske qosylǵany týraly jazdyq.