ShQO joldaryn qansha dron patrýldep júr
ÓSKEMEN. KAZINFORM — Shyǵys Qazaqstan oblysynda polıtseıler byltyrdan bastap jol erejesin buzǵandardy dronmen anyqtap jatyr.
Óńirdegi patrýldik polıtsııa qyzmetkerleri jol qozǵalysy erejelerin buzatyndardy anyqtaý úshin jańa ádiske kóshken.
Ótken jyldan beri olar pılotsyz ushý apparattaryn belsendi qoldanýda. Ásirese jaz kezinde kameralar ornatylmaǵan týrıstik baǵyttaǵy joldarda dron kádege jaratylyp jatyr.
Osy rette el arasynda naqty qansha dronnyń bar ekendigi, olardyń qaı baǵyttaǵy joldarda qoldanylatyny jaıly saýap kóp.
Sonyń jaýabyn bilý úshin Kazinform tilshisi ShQO Polıtsııa departamentine resmı saýalhat joldady.
— Búgingi tańda polıtsııa departamentiniń balansynda 10 ushqyshsyz ushý apparaty bar. Drondar oblystyń qala syrtyndaǵy apatty-qaýipti jol ýchaskelerinde qoldanylady. Osy jyldyń aqpan aıynda jergilikti atqarýshy organdarǵa taǵy 10 dron satyp alýǵa bıýdjettik ótinim joldandy, — dep jaýap berdi departament bastyǵynyń orynbasary Rıfhat Taýfıkov.
2024 jyly polıtsııa qyzmetkerleri ushqyshsyz ushý apparattarymen jol júrisi qaǵıdalaryn óreskel buzýdyń 30-ǵa jýyq faktisin tirkedi.
Al jyl basynan beri drondar arqyly 10-ǵa tarta ereje buzýshy jaýapqa tartyldy. Bul kórsetkish byltyrǵy kezeńmen salystyrǵanda birshama artty.
Demek, drondar óz tıimdiligin kórsetip otyr.
— Drondar qarsy jolaqqa shyǵý jáne jol qaýipsizdigine qater tóndiretin basqa da qaýipti manevrler sııaqty zańbuzýshylyqtardy tirkeýge kómektesedi. Pılotsyz ushý apparattaryn qoldaný polıtsııaǵa qıyn jol jaǵdaılary men apatty aımaqtarda qozǵalysty baqylaýǵa, zańbuzýshylyqtarǵa qatysty jedel áreket etýge múmkindik beredi, — deıdi Rıfhat Taýfıkov.
Eske salsaq, osyǵan deıin elimizde dron paıdalanýdy úıretetin 1100 orta mektep bar ekenin jazǵanbyz.