ShQO zeınetkerleri ınternetti ıgermek
Bul másele Danıal Ahmetovtyń qoǵamdyq uıym ókilderimen kezdesýinde kóterilgen bolatyn. Oblystyq ardagerler keńesiniń tóraǵasy Aıtqazy Sherýbaev sonda aıtylǵan tapsyrmalar boıynsha baǵdarlama ázirlep jatqandaryn aıtady.
«Kompıýterlik saýattylyq ásirese jalǵyzilikti qarttarǵa kóp qolǵabys tıgizbek. Bizge túsetin hattardyń arasynda osy maǵynada jazylǵan ótinishter kóp. Qalada turatyn qarııalar aı saıyn jeti birdeı kommýnaldyq tólem jasaıdy. Onyń árqaısynan komıssııa retide 120-150 teńge ustalady. Aýa raıynyń qolaısyzdyǵy da egde tartqan adamdarǵa qosymsha qıyndyq týǵyzyp jatady. Osyny eskere kele, qarııalarymyzdyń ótinishin oblys ákimine jetkizgenbiz. Aımaq basshysy usynysymyzdy qoldaýǵa ázir ekenin aıtty» - deıdi Aıtqazy Sherýbaev.
Oblysta shamamen 240 myń zeınetker bar. Solardyń tek 2-3 paıyzy kompıýterdi meńgergen. Oblystyq ardagerler keńesi bul kórsetkishti 50 paıyzǵa deıin kóterýdi kózdep otyr.
Ázirge bul maqsatqa qansha qarjy bólinetini belgisiz. Áýeli ardagerler keńesi kompıýter meńgerýge nıetti ardagerlerdiń sanyn eseptep, tıisti basqarmalarmen birge arnaıy oqytý baǵdarlamasyn qurýy tıis. Jańa kýrs jergilikti kitaphanalardyń bazasynda uıymdastyrylmaq. Onda zeınetkerler kompıýter qoldanýdy úırenip qana qoımaı, gadjetten ınternetke kirý, dári-dármektiń baǵasyn bilip, tapsyrys berý, «elektrondy ámııan» arqyly tólemder aýdarý sııaqty operatsııalardy meńgeredi. Osy joba aıasynda kitaphanalarǵa qosymsha noýtbýkter de berilýi múmkin.
«Oblystyq jumyspen qamtý jáne áleýmettik baǵdarlamalar basqarmasymen keńese otyryp, jobaǵa jasy 70-ke deıingi zeınetkerlerdi tartýdy uıǵardyq. Eki aptanyń ishinde naqty joba daıyndap, ákimniń aldyna kirgizemiz. Sodan keıin BAQ arqyly halyqty qulaqtandyramyz. Keıin osy tásilmen zeınetkerlerge latyn álipbıin de oqytsaq degen jospar bar. Ol úshin áýeli álipbı naqty bekitilýi kerek» - deıdi keńes tóraǵasy.
Danıal Ahmetov bul joba aýyldardy da qamtý kerektigin aıtyp otyr.
«Aldaǵy eki jylda oblystyń barlyq aýyldary ınternetke qosylady. Osy kezde zeıentkerler onyń ıgiligin óz betterimen paıdalana alýy kerek. Joba óz tıimdiligin dáleldese, ony qarjylandyrýǵa daıynbyz» - deıdi D.Ahmetov.