ShQO turǵynynyń kóliginen zańsyz aýlanǵan 150 kelige jýyq balyq tabyldy

ÓSKEMEN. QazAqparat – Shyǵys Qazaqstan oblysy turǵynynyń kóliginen zańsyz aýlanǵan 150 kelige jýyq balyq tabyldy, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetine súıensek, patrýldik polıtsııa batalonynyń ınspektorlary «Óskemen-Samar» tasjolynda «GAZ» markaly avtokólikti toqtatqan. Kólik tizgininde 54 jastaǵy Óskemen qalasynyń turǵyny boldy.

«Polıtsııa qyzmetkerleri Samar aýylynan oblys ortalyǵyna jol tartqan avtokólik salonynan 20 qap balyq tapty. Zańsyz aýlanǵan balyqtyń jalpy salmaǵy 143 kelini quraǵan. Osynyń saldarynan memleketke 256 myń teńge mólsherinde materıaldyq zalal keltirildi», - dep habarlady vedomstvo ókilderi.

Kólik júrgizýshi óz sózinde balyqty Samar aýylyndaǵy bazardan satyp alǵanyn jetkizgen. Atalǵan fakti boıynsha materıaldar Ulan aýdandyq Polıtsııa bóliminiń jedel tergeý tobyna joldandy.