ShQO turǵynynyń kóliginen zańsyz aýlanǵan 136 keli balyq tabyldy
ShQO Polıtsııa departamenti baspasóz qyzmetiniń málimetine súıensek, 12-18 naýryz aralyǵynda óńir aýmaǵynda «Quqyq tártibi» jedel-aldyn alý sharasy júrgizilýde. Polıtseıler kúsheıtilgen rejımde jumys istep jatyr.
«Sońǵy 5 kúnniń qorytyndysy boıynsha tártip saqshylary izin sýytpaı 147 qylmysty jáne buryn jasalǵan 74 qylmysty ashty. 7800-den astam ákimshilik quqyq buzýshylyq anyqtalǵan. Onyń ishinde usaq buzaqylyq jasaǵan – 955, alkogoldi ishimdik ishkeni nemese qoǵamdyq oryndarda mas kúıde júrgeni úshin – 1270 adam jaýapqa tartyldy. Qaýipsizdik beldigin taqpaǵan 1014 júrgizýshi, jaıaý júrginshilerdiń júrý erejelerin buzǵany úshin 1301 adam aıyppul arqalady», - dep habarlady vedomstvo ókilderi.
Shara barysynda patrýldik polıtsııa rotasynyń ınspektorlary Meıirjan Jaqsybek pen Dýman Sovethanov «Almaty-Óskemen» tasjolynyń 970-shaqyrymynda «Toıota Kamrı» markaly avtokóligin toqtatqan. Tekserý barysynda kólik salonynda tıisti qujattary joq 136 keli balyq tabyldy.
«Memleketke keltirilgen shyǵyn mólsheri 265 000 teńgeni qurady. Atalǵan fakti boıynsha QR ÁQBtK 389 babyna sáıkes (jabaıy janýarlar men ósimdikterdiń túrlerin, olardyń bólikterin nemese derıvattaryn zańsyz ıemdený, ótkizý, tasymaldaý, ákelý, áketý, saqtaý, ustaý) ákimshilik hattama toltyrylǵan», - delingen aqparatta.