ShQO turǵyndaryn aldap soqqan qyz 7 mln teńge paıda kórgen

ÓSKEMEN. QazAqparat – Shyǵys Qazaqstan oblysy Zaısan aýdanynyń turǵyndaryn aldap soqqan 20 jastaǵy qyz 7 mln teńge paıda kórgen, dep habarlaıdy QazAqparat tilshisi.

ShQO polıtsııa departamenti baspasóz qyzmetiniń málimetine súıensek, tártip saqshylaryna habarlasqan azamat óz atyna nesıe rásimdegen tanysyna shara qoldanýdy suraǵan. Belgili bolǵandaı, Zaısan qalasynda turatyn 20 jastaǵy qyz odan basqa da adamdardy aldap soqty.

«Turǵyndardy sózge tartqan qyz olardyń atynan taýarlyq nesıe alyp otyrdy. Sonyń saldarynan 7 adam zardap shekti. Jábirlenýshilerge keltirilgen shyǵynnyń jalpy kólemi – 7 370 000 teńgeni quraǵan», - dep habarlady vedomstvo ókilderi.

Jedel-izdestirý sharalaryn júrgizgen polıtseıler kúdiktini qolǵa túsirdi. Ol óz kinásin tolyq moıyndady. Qazirgi ýaqytta atalǵan fakti boıynsha QR QK-niń 190-baby 2-bóligine (Alaıaqtyq) sáıkes sotqa deıingi tergeý amaldary júrgizýde.