ShQO túlekteri UBT-ny 16 ótkizý pýnktinde tapsyrady

ÓSKEMEN. QazAqparat – Shyǵys Qazaqstan oblysyndaǵy mektep túlekteriniń 84,4 paıyzy UBT tapsyrýǵa nıet bildirgen. Bul kórsetkish ótken jylǵymen salystyrǵanda 8,8 paıyzǵa artty, dep habarlaıdy QazAqparat tilshisi.

Búgin ShQO Aqparattyq ortalyǵynda ótken brıfıng barysynda oblystyq Bilim basqarmasynyń basshysy Saırangúl Jumadilova UBT-nyń qalaı ótkiziletini týraly aıtyp berdi.

«Ulttyq biryńǵaı testileý 20 maýsym men 5 shilde aralyǵynda ótedi. Testileý barysynda barlyq sanıtarlyq-epıdemıologııalyq sharalar qatań saqtalady. Jalpy oblys boıynsha 16 UBT ótkizý pýnkti daıyndalǵan. Onyń ishinde 4 aımaqtyq ýnıversıtet pen 12 orta mektep bar», - dedi ol.

Basqarma basshysynyń aıtýynsha, bıyl UBT-nyń testtik bazasy 30 paıyzǵa jańartylǵan. Árbir ótkizý pýnktinde appelıatsııalyq komıssııalar qurylmaq. Budan bólek, oblysta 2338 balany UBT pýnktine deıin tasymaldaý uıymdastyrylady.

Brıfıngte Ulttyq testileý ortalyǵynyń ShQO boıynsha fılıal jetekshisi Dınara Meıirǵazına bıyl UBT tapsyrýshylarǵa kalkýlıator paıdalanýǵa ruqsat berilgenin atap ótti.

«Beınejazbany qaraý kezinde talapkerlerdiń tyıym salynǵan zattardy paıdalanǵany anyqtalsa, onda UBT nátıjesi men bilim berý granty joıylady. Sondaı-aq buryn testileý ýaqyty 3 saǵat 50 mınýt bolsa, qazir 4 saǵatqa deıin uzartyldy», - dedi Dınara Meıirǵazına.