ShQO taýly jerlerinde 13 aqpanǵa deıin qar kóshkini qaýpi saqtalady

ÓSKEMEN. QazAqparat – Shyǵys Qazaqstan oblysynda 13 aqpanǵa deıin qar kóshkini júrý qaýpi bar, dep habarlaıdy QazAqparat tilshisi.

Oblys boıynsha 11-13 aqpan aralyǵynda taýly jerlerde qar kóshkini júrý qaýpi bar.

«Meteorologııalyq jaǵdaıdyń ózgerýine, jıi qar jaýýyna jáne jeldiń kúsheıýine baılanysty óńirdiń taýly jerlerinde qar kóshkini túsýi yqtımal. Osy rette, turǵyndarǵa barynsha abaı bolýdy, eshbir jaǵdaıda taýǵa shyqpaý qajettigin eskertemiz», - dep habarlady ShQO Tótenshe jaǵdaılar departamentiniń baspasóz qyzmeti.

Sondaı-aq qutqarýshylar óńir jurtshylyǵyna alys saparǵa shyǵar aldynda joldardyń jaı-kúıin «Dármen» mobıldi qosymshasy arqyly tekserip otyrýǵa keńes berdi.

Eger qandaı da bir qıyndyqqa tap bolsańyz, birden «112» nómirine qońyraý shalyńyz.