ShQO perzenthanasynda daýys berý qarqyny joǵary

ÓSKEMEN. QazAqparat – Óskemen qalasynda tórtinshi balasyn dúnıege ákelgen áıel perzenthanada daýys berdi, dep habarlaıdy QazAqparat tilshisi.

Búgin elimizde Parlament Májilisine jáne barlyq deńgeıdegi máslıhattarǵa depýtattardy kezekten tys saılaý ótip jatyr. Bul saıası naýqannan jańa bosanǵan áıelder de qalys qalmaýda.

Máselen, Óskemendegi Ana men bala ortalyǵynda №60 jabyq saılaý ýchaskesi ornalasqan. Perzenthanada barlyǵy 200-den astam adam daýys berýge quqyly. Tańerteńnen beri 50-den astamy óz tańdaýyn jasap úlgerdi. Sonyń biri – Elvıra Raıanova.

«Minekeı, tórt balanyń anasy bolyp otyrmyn. Búgin meniń jańa týǵan sábıim ekeýmiz óz tańdaýymyzdy jasadyq. Bul balalarymnyń jáne elimniń bolashaǵy úshin jasalǵan tańdaý! Meniń oıymsha, bul kúni árbir azamat daýys berýi kerek», - deıdi ol.

Saılaý qarsańynda óńirde 14 sábı – 4 ul jáne 10 qyz dúnıege kelgen.

Aıta keteıik, Óskemende búgin 122 saılaý ýchaskesi jumys isteıdi. Qala boıynsha barlyǵy 243 169 adam daýys bere alady. Osy ýaqytqa deıin eshqandaı quqyq buzýshylyq anyqtalmady.