ShQO ormandaryndaǵy 170 gektarǵa jýyq jer memleketke qaıtaryldy

ÓSKEMEN. KAZINFORM – Shyǵys Qazaqstan oblysy ormandaryndaǵy 170 gektarǵa jýyq jer memleketke qaıtaryldy. 

ShQO mamandandyrylǵan tabıǵat qorǵaý prokýratýrasy «Óskemen orman sharýashylyǵy» kommýnaldyq mekemesiniń qyzmetine tekserý júrgizdi. Sonyń nátıjesinde, orman paıdalanýshysy – «Qazaqstan Bıpek Avto» AQ jalpy aýdany 150,7 gektar ýchaskesinde uzaq merzimdi orman paıdalaný talaptaryn júıeli túrde buzǵany anyqtaldy.

«Ýákiletti organnyń kelisiminsiz jalpy aýmaǵy 19 gektardy quraıtyn ýchaskelerde qurylys jumystary júrgizilgen. Orman paıdalanýshy órt qaýipsizdigi erejelerin de saqtamaı, órtke qarsy is-sharalardy ýaqtyly oryndamaǵan», - dep habarlady oblys prokýratýrasynyń baspasóz qyzmetinen. 

Qabyldanǵan sharalar nátıjesinde, sot sheshimimen uzaq merzimdi orman paıdalanýdyń 13 sharty buzylyp, memlekettik orman qoryndaǵy 169,7 gektar jer memleketke qaıtaryldy. Sot aktisi zańdy kúshine endi. 

Eske salaıyq, buǵan deıin Shyǵys Qazaqstan oblysyndaǵy Rıdder jylý elektr ortalyǵynda bıylǵy jylytý maýsymynda aqaý shyqpaǵanyn jazǵan bolatynbyz.