ShQO-nyń Glýbokoe aýdanynda kúshti jelden aǵashtar qulap, kósheler jaryqsyz qaldy

ÓSKEMEN. QazAqparat – Shyǵys Qazaqstan oblysy Glýbokoe aýdanynda qatty jeldiń saldarynan aǵashtar qulap, kósheler jaryqsyz qaldy, dep habarlaıdy QazAqparat tilshisi.

ShQO aqparat ortalyǵynyń málimetine súıensek, Glýbokoe aýdany Beloýsovka kentinde qatty daýyl soqty.

Sonyń saldarynan aǵashtar qulap, elektr jelilerine zaqym kelip, birneshe kóshe jaryqsyz otyr.

Belgili bolǵandaı, 4500 tutynýshynyń 718 turǵyny elektr qýatynsyz qaldy. Qazirgi ýaqytta 280 tutynýshynyń elektrmen jabdyqtaýy qalpyna keldi.

«Apattyń saldaryn qalpyna keltirý jumystary júrgizilýde. Sol jerde 4 brıgada jumys isteýde, 4 tehnıka jumyldyryldy. Sonymen qatar «GorSvet LTD» JShS jáne «GosStroı» JShS merdigerlik uıymdarynyń kúshteri tartyldy. TJD qutqarýshylary aǵash úıindilerin jınaýda», - delingen habarlamada.