ShQO-nyń birqatar aýdandarynda túlekterdiń UBT-ǵa qatysý deńgeıi tómen

ÓSKEMEN. QazAqparat - ShQO-da túlekterdiń UBT-ǵa qatysý deńgeıi kóńil kónshiter jaǵdaıda emes. Bul týraly oblystyq ákimdikte ótken jıynda aıtyldy, dep habarlaıdy QazAqparat Altaynews-ke silteme jasap.

Jalpy UBT boıynsha oblystyq ortasha kórsetkish joǵarylady. Alaıda keı aýdandarda UBT-ǵa qatysýshylardyń sany tómendep ketken.

"Rıdder, Borodýlıha jáne Shemonaıha aýdandarynyń ákimderine bilim bólimderiniń jumysyn retteýdi tapsyramyn. Ne sebepti UBT-ǵa qatysý deńgeıi tómendep ketken? - dedi oblys ákimi Danıal Ahmetov. - "Basqa elderge oqýǵa ketkendikten UBT tapsyrmady" degen bos sóz. Eshkim egjeı-tegjeıli taldaý jasap, neshe bala shetelge oqýǵa ketkenin teksermegen. Bilim basshylary ózderiniń kásibı dármensizdikterin jasyrý úshin, shamasy bar túlekter tapsyrsyn, qalǵandaryna mindetti emes dep balalardy irikteıdi".

Osy máselege qatysty aımaq basshysy sońǵy úsh jylǵa taldaý jasaýdy tapsyrdy. Endi bilim bólimderi osy úsh jylda UBT tapsyrmaǵan jáne shetelge oqýǵa ketken túlekter týraly tolyq málimetti usynýǵa tıis.