ShQO-lyq órt sóndirýshi aǵashtan túrli buıymdar jasaıdy

ÓSKEMEN. QazAqparat – Shyǵys Qazaqstan oblysy Katonqaraǵaı aýdanynda órt sóndirýshi bolyp jumys isteıtin Eldar Muhtaruly aǵashtan túrli buıymdar jasaıdy, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, Eldar Muhtaruly Katonqaraǵaı aýdanyndaǵy №27 órt sóndirý bóliminde jumys isteıdi. Qaýyrt qyzmetten bosaǵan sátterde ol qolónermen aınalysady.

«Aǵashtan túrli buıym jasaýǵa degen qyzyǵýshylyǵymdy mektep qabyrǵasynda oqyp júrgende eńbek pániniń muǵalimi oıatty. Sodan beri bul hobbıime aınaldy. Aǵashty kesip, ony sheberlikpen óńdeý ońaı sharýa emes. Bul birshama ýaqytty jáne eptilikti talap etedi. Shydamdylyq pen tózimdilik qajet», - dedi ol.

Órt sóndirýshiniń ózindik eksklıýzıvti kollektsııasy bar. Onyń qatarynda – oqtaý, sham ornytqysh tur. Qazirgi ýaqytta astaý, tostaǵan syndy ulttyq ydystardy da daıyndaıdy. Ony jaqyndaryna, dostaryna jáne áriptesterine syılyq retinde beredi.

Eldar TJD qatarynda qyzmet etip júrip, Málik Ǵabdýllın atyndaǵy azamattyq qorǵaý akademııasynda bilim alýda. Ol ofıtser bolýdy maqsat etken.