ShQO: Qysta qatpaıtyn 3 kólshiktiń sýy shıpaly ekeni anyqtaldy

ÓSKEMEN. QazAqparat - Shyǵys Qazaqstannyń Besqaraǵaı aýdanynda qysta qatpaıtyn kól bar. 3 shaǵyn kólshikten turatyn qaınar teri aýrýyna shıpaly ekeni anyqtaldy, dep habarlaıdy QazAqparat tilshisi.

D.Serikbaev atyndaǵy ShQMTÝ ǵalymdary men týrızm mamandary óńirdegi 8 kól men 2 bastaýdyń sýyn zerttedi. Zertteý jumystary Alakól, Marqakól, Zaısan, Sibe, Dýbyǵaly, Shybyndykól, Rahman qaınary, Qońyr áýlıe jáne Áýlıebulaq syndy tanymal kózderde júrdi. Oblystyq týrıstik-aqparattyq ortalyqtyń dırektory Symbat Ramazanov atalmysh zertteýlerdiń qorytyndysy aldaǵy aptada belgili bolatynyn aıtady.

«Bizdegi týrıstik nysanǵa aınalyp ketken ózen-kólderdiń shıpaly ekendigin dáleldeıtin eshqandaı retsenzııalyq qujat joq. Biraq bul atalmysh oryndarǵa el bilmestikpen baryp júr degen sóz emes. Sheteldiń týrıstik kompanııalaryn qyzyqtyrý úshin osy qujattardy retteýdiń mańyzy zor. Sýdyń quramyndaǵy ıondyq tuzdardyń, rodonnyń mólsherin anyqtaý qajet. Soǵan qarap sýmen emdelý sharalarynyń ýaqytyn belgileýge bolady» - deıdi ortalyq dırektory Symbat Ramazanov.

Elimizde mundaı zertteýmen aınalysatyn arnaıy mekeme joq eken. Sondyqtan bastamashy top Reseıdiń kýrortologııa jáne fızıoterapııa boıynsha ǵylymı-zertteý ınstıtýtyna júginipti. Osy zertteýlerdiń eń úlken jemisi Shoshqaly kól bolyp otyr. Besqaraǵaı aýdanynyń ortalyǵynan 85 shaqyrymda jatqan kóldiń qysta nege qatpaıtynyn mamandar tuzdyń kóptigimen túsindirip kelgen.  Reseılik mamandar onyń sýyn teri aýrýlaryna bulaý retinde paıdalaný tıimdi ekenin anyqtady.

«Shoshqalynyń sýyndaǵy ıondy tuzdar júıke júıesi, qan aınalymy, as qorytý, nesep júıesi arýlaryna da taptyrmas dárý ekeni dáleldendi» - deıdi Symbat Ramazanov. 

Atalmysh baǵyttaǵy jumystar jaz shyǵa jalǵasyp, taǵy 4 kóldiń sýy men balshyǵyna banelogııalyq zertteý júrgizilmek. Nysanada Arasan,  Monastyr, Jalańashkól jáne Jazaba kólderi tur.