ShQO qutqarýshylary jetýi qıyn sý aıdyndarynyń jaǵalaýyn atqa minip patrýldeýde

ÓSKEMEN. QazAqparat – Shyǵys Qazaqstan oblysynyń qutqarýshylary jetýi qıyn sý aıdyndarynyń jaǵalaýyn atqa minip patrýldeýde, dep habarlaıdy QazAqparat tilshisi.

ShQO tótenshe jaǵdaılar departamenti baspasóz qyzmetiniń málimetine súıensek, qutqarýshylar, polıtseıler men ormanshylar atqa minip, reıdke shyqty.

Olar saıajaı ýchaskelerinde, ormandarda órt qaýipsizdigi erejelerin buzýshylardy jedel anyqtaý jáne jetýi qıyn sý aıdyndarynyń jaǵalaýlarynda jazataıym oqıǵalardyń aldyn alý úshin patrýldeýde.

Qazirgi ýaqytta mobıldi toptar órt qaýipsizdigi erejelerin buzǵan 35 adamdy ákimshilik jaýapkershilikke tartty. Sondaı-aq tyıym salynǵan jerlerde shomylǵandar da jaýapqa tartylyp jatyr.

«Profılaktıkalyq reıdterge atpen shyǵyp júrgenimizge birneshe jyl boldy. Bul adamdar tynyshtyqta demalǵysy keletin taýly-toǵaıly jerlerdi qamtýǵa múmkindik beredi. Biz olarmen sóılesip, órt qaýpi joǵary kezeńde ot jaǵýǵa bolmaıtynyn jáne qutqarýshylar men dárigerler joq jabdyqtalmaǵan jerlerde shomylýǵa tyıym salynǵanyn túsindiremiz. Polıtseılermen birge sý aıdyndarynda alkogoldi ishimdik ishilmeýin de qadaǵalaımyz», - deıdi oblystyq TJD bastyǵynyń orynbasary Arman Toqanov.