ShQO qutqarýshylary balalardyń terezeden qulaýynyń aldyn alý úshin aktsııa ótkizdi

ÓSKEMEN. QazAqparat – Shyǵys Qazaqstan oblysynyń qutqarýshylary balalardyń terezeden qulaýynyń aldyn alý úshin arnaıy aktsııa ótkizdi, dep habarlaıdy QazAqparat tilshisi.

ShQO tótenshe jaǵdaılar departamenti baspasóz qyzmetiniń málimetine súıensek, kóktem shyqqanda óńirde balalar terezeden qulap ketetin oqys oqıǵalar bolyp jatady.

Sońǵy osyndaı jaǵdaı 9 mamyr kúni Altaı qalasynda bolǵan.

Osynyń aldyn alý úshin TJD qutqarýshylary «Toqta, balaqaı!» atty arnaıy aktsııa ótkizdi.

Aktsııa aıasynda joǵary qabattaǵy úılerde turatyn kópbalaly otbasylardyń terezesine qorǵanys qurylǵysy ornatyldy.

«Ál Farabı kóshesinde ornalasqan 9-qabattaǵy páterde turatyn otbasy 6 bala tárbıelep otyr. Úıdiń terezelerine biz ornatqan arnaıy qulyptar jazataıym oqıǵadan qorǵaıdy», - deıdi Óskemen qalalyq TJB aǵa ofıtseri Aslan Qapaev.

Oblystyq TJD psıhology Svetlana Andrýsenko qaıǵyly oqıǵalardyń basty sebebi - balalardy qaraýsyz qaldyrý, terezelerde qorǵanys qurylǵylarynyń bolmaýy jáne ata - analardyń ózderiniń balalardy terezeden dalaǵa qaraýǵa úıretýi.

Osy rette qutqarýshylar kópqabatty úıde bala terezeden qulamas úshin ne isteý kerektigin taǵy bir márte túsindirdi.

Oqys oqıǵanyń aldyn alǵyńyz kelse:

- Balalardy qaraýsyz qaldyrmańyz.

- Páter terezelerine arnaıy qorǵanys quraldary qoıylýy tıis.

- Bala ózdiginen asha almaıtyndaı etip tereze tutqasyn qulyptańyz.

- Balanyń tereze aldyna shyǵýyna jol bermes úshin jıhazdyń barlyq túrin terezelerden alysqa qoıyńyz.

- Balany tereze aldyna shyǵaryp, kóshede ne bolyp jatqanyn kórsetýge úıretpeńiz. Ol siz joqta sony qaıtalaýy múmkin.

- Balalarǵa eresekterdiń qaraýynsyz balkonǵa shyǵýǵa ruqsat bermeńiz.