ShQO-ǵa ózge óńirlerden esirtki tasymaldaǵan 8 adam ustaldy
ShQO Polıtsııa departamenti baspasóz qyzmetiniń málimetine súıensek, tártip saqshylary esirtki qylmysyna qarsy is-qımyl barysynda oblys aýmaǵyna basqa qalalardan kelip sıntetıka untaqty saýdalaǵan kúdiktilerdi qolǵa túsirdi.
«Olar satyp alýshylardy ınternet dúken arqyly taýyp otyrdy. Keıin esirtkini túnde aldyn ala kelisilgen jerlerge tastaǵan. Jarty aıǵa jýyq ýaqyt ishinde polıtsııa qyzmetkerleri kýrerlerdi qolǵa túsirýge negiz bolatyn dálelder jınady. Sodan keıin ustaý operatsııasy júrgizildi», - dep habarlady vedomstvo ókilderi.
Pavlodar, Qostanaı jáne Aqtóbe oblystarynyń turǵyndary bolǵan 8 adamnan sıntetıka esirtkiniń 1 myń dozasy tárkilendi. Kúdiktilerdiń arasynda kolledj stýdenti men kámeletke tolmaǵan bala da bar. Qalǵandary 23-30 jas aralyǵynda.
«Ustalǵandardyń barlyǵy sot sanktsııasymen qamaýǵa alyndy. Olarǵa qatysty QR QK-niń 296, 297-baptary boıynsha tergeý amaldary júrgizilýde. Kúdiktiler 15 jylǵa deıin bas bostandyǵynan aıyrylýy múmkin», - dedi oblystyq PD bastyǵynyń orynbasary Talǵat Shaıahmetov.
