ShQO-da esirtki graffıtıleri boıynsha 8 qylmystyq is qozǵaldy

ÓSKEMEN. KAZINFORM — Turǵyn úı aýlalaryn aralaý barysynda 50-den astam esirtki graffıtıleri anyqtaldy. Bul týraly Shyǵys Qazaqstan oblysy prokýratýrasynyń baspasóz qyzmeti habarlady. 

Qoǵamda «Zań jáne Tártip» qaǵıdatyn odan ári nyǵaıtý maqsatynda Óskemen qalasynda «esirtki graffıtı» dep atalatyn esirtki satatyn onlaın-dúkenderdiń jarnamasy men «qoımashy bolyp jumys isteý» týraly usynystar jazylǵan jazýlarǵa qarsy aýqymdy aktsııa ótkizildi.

Aktsııaǵa qala prokýratýrasynyń, polıtsııanyń, jergilikti atqarýshy organdardyń qyzmetkerleri jáne jastar qozǵalysynyń belsendilerinen quralǵan 100-ge jýyq adam qatysty.

— Turǵyn úı aýlalaryn aralaý barysynda 50-den astam esirtki graffıtıleri anyqtaldy. Reıdterdiń nátıjesinde QK 299-1-baby «Esirtki quraldaryn nasıhattaý nemese zańsyz jarnamalaý» boıynsha 8 qylmystyq is qozǵaldy, — delingen Shyǵys Qazaqstan oblysynyń prokýratýrasy habarlamasynda.

Aıta ketelik Rýdnyıda 16 jastaǵy jigit mefedronnyń iri partııasymen ustaldy.