ShQO ekologtary halyq shaǵymynan soń Maraldy aýylyndaǵy aýa sapasyn tekserdi

ÓSKEMEN. KAZINFORM — Shyǵys Qazaqstan oblysy Kúrshim aýdanyna qarasty Maraldy aýyly turǵyndarynyń aryzynan keıin ekologtar aýa sapasyna qatysty jospardan tys tekserý júrgizdi. 

«Maralıha» kompanııasy aýyldaǵy altyn ken ornynda jarylys jumystaryn júrgizip jatyr.

Al jergilikti halyq sonyń saldarynan aýaǵa zııandy zattar taralýy múmkin dep alańdady.

ShQO Ekologııa departamentiniń málimetinshe, shaǵym túsken soń mamandar tekserýge aldyn ala eskertýsiz bardy. Tekserý kezinde ken ornynda jarylys jumystary júrgizilip jatqan. Bul aýadaǵy zııandy zattardyń naqty deńgeıin anyqtaýǵa múmkindik berdi.

— Turǵyndar aýanyń lastaný deńgeıine alańdap, kásiporyn tekserýshiler kelgenge deıin jarylys jumystaryn ýaqytsha toqtatady dep boljaǵan edi. Osyǵan baılanysty biz monıtorıngti kenetten, ıaǵnı jumys barysy júrip jatqan sátte ótkizdik, — dep habalady departamenttiń baspasóz qyzmetinen.

Tekserý nátıjesinde aýadaǵy zııandy zattardyń ruqsat etilgen shekten asý faktisi tirkelmegen.
Vedomstvo ókilderi halyqtan túsken árbir shaǵymǵa jedel áreket etýdi jalǵastyra beretindikterin atap ótti.

Eske salsaq, osyǵan deıin Ekologııalyq máseleler týraly Telegram-bot halyqtyń 22 myń aryz-shaǵymyn qabyldaǵany habarlanǵan.