ShQO Dostyq úıiniń ókilderi etnosaralyq túıtkildi máselelerdi sheshý joldaryn zerdeledi
Sársen Amanjolov atyndaǵy Shyǵys Qazaqstan ýnıversıtetinde «Qazaqstannyń demografııalyq qaýipsizdik deńgeıin baǵalaý» granttyq ǵylymı jobasy aıasynda HHІ halyqaralyq ǵylymı-tájirıbelik konferentsııa ótti.
Sonyń aıasynda ShQO Dostyq úıiniń ǵylymı-saraptamalyq toby D.Serikbaev atyndaǵy QHA kafedrasymen birlesip, etnosaralyq saladaǵy túıtkildi máselelerdi sheshý joldaryn zerdeledi.
Shara ShQÝ rektory Muhtar Tólegenniń jáne Irkýtsk memlekettik ýnıversıtetiniń ǵylymı jáne halyqaralyq ister jónindegi prorektory Konstantın Grıgorıchevtiń quttyqtaý sózimen bastaldy.
Konferentsııa barysynda Irkýtsk memlekettik ýnıversıtetimen ózara yntymaqtastyq týraly kelisimge qol qoıyldy.
«Kóshi-qon jáne demografııalyq qaýipsizdik» atty birinshi sessııanyń moderatory tarıh ǵylymdarynyń doktory, «Altaıtaný» ǵylymı-zertteý ortalyǵynyń bas qyzmetkeri Aleksandr Alekseenko boldy.
Qozǵalǵan taqyryptardyń biri – «2020-2022 jyldardaǵy Qazaqstandaǵy reseılik ımmıgratsııa, onyń sebepteri, dınamıkasy, qurylymy, saldary».
Fılosofııa ǵylymdarynyń kandıdaty, táýelsiz taldaýshy, Qazaqstan men Ortalyq Azııadaǵy kóshi-qon saıasaty boıynsha halyqaralyq keńesshi Elena Sadovskaıa baıandama jasady.
Ekinshi sessııa «Demografııalyq qaýipsizdik deńgeıin baǵalaý», úshinshi sessııa «Ýrbanızatsııa jáne qalalyq keńistikti damytý konteksindegi demografııalyq qaýipsizdik» dep ataldy.
«Zaman talabyn túsinýdiń negizi retinde etnodemografııalyq protsesterdi retrospektıvti taldaý» atty qorytyndy sessııanyń moderatory tarıh ǵylymdarynyń kandıdaty Gúljan Sársenbaeva boldy.
Tarıh magıstri Shmıdt Valdemar «Qazaqstan aýmaǵyndaǵy arnaıy qonys aýdarýshylardyń tarıhy týraly» taqyrybynda baıandamasyn oqydy.
Aıta keteıik, konferentsııaǵa Shyǵys Qazaqstannyń ǵylymı zııaly qaýymy men basqa elderdiń mamandary onlaın baılanys arqyly qatysty.
