ShQO-dan tabylǵan artefaktiler babamyzdyń metallýrgııany myqty meńgergenin kórsetedi – Danıal Ahmetov

ELEKE SAZY. QazAqparat - Qazirgi Shyǵys Qazaqstan oblysynyń aýmaǵynda ómir súrgen ejelgi ata-babalarymyz otyryqshy turmys saltyn ustanǵan. Jerdi óńdeý, aýyl sharýashylyǵy, metall óndirý jáne ony óńdeý salalaryn joǵary deńgeıde ıgergen. Ulan aýdanyndaǵy Aqbaýyr arheologııalyq keshenine barǵan aımaq basshysy Danıal Ahmetov osyndaı pikir aıtty.

Aımaq basshysy Eleke Sazy ústirtindegi arheologııalyq jumystardyń barysymen tanysty.

Onda erte saq dáýirinen bastap orta túrki kezeńine deıingi birneshe obadan turatyn úlken qorym tabyldy.

Álemge áıgili ǵalym Zeınolla Samashev úsh jyldan beri osynda qazba jumystaryn júrgizip keledi.

Tarıhshy ǵalymdar men arheologtardyń jumysynyń arqasynda aımaqtyń qazirgi turǵyndarynyń ejelgi ata-babalary osy jerde otyryqshy ómir saltyn ustanǵany jáne ártúrli salalarda, sonyń ishinde metall óndirý jáne óńdeý salasynda úlken jetistikke jetkeni belgili boldy.

Tabylǵan artefaktiler men quraldar balqytylǵan metaldan túrli buıymdar jasaıtyn «sheberhanalar» bolǵanyn aıǵaqtaıdy.

Júrgizilgen qazba jumystary ejelgi qazaqtardyń aýyl sharýashylyǵy salasymen aınalysyp, jerdi ıgerýde óte saýatty bolǵanyn dáleldeıdi.

«Osy jerden tabylǵan jáne aldaǵy ýaqytta da tabylatyn eksponattar bizdiń murajaılarymyzdyń qoryn tolyqtyryp qana qoımaı, Qazaqstan tarıhyna qatysty kóptegen suraqtarǵa jaýap beretinine senimdimin. Budan bólek, taǵy 20 ýchaske bar, olardy da muqııat zertteý qajet», - dedi ǵalymdarmen kezdesken oblys ákimi Danıal Ahmetov.

Aıta ketý kerek, arheolog Zeınolla Samashev bastaǵan zertteýshiler Shyǵys Qazaqstannyń Aqbaýyr shatqalynan saq zamanynan beri saqtalǵan metallýrgııalyq jádigerlerdi tapqan bolatyn.

Aqbaýyr arheologııalyq kesheniniń qazba jumysyna qazaqstandyq ǵalymdarmen birge halyqaralyq ekspedıtsııa músheleri jáne Sársen Amanjolov atyndaǵy Shyǵys Qazaqstan memlekettik ýnıversıtetiniń, Shákárim atyndaǵy ýnıversıtettiń, Geodezııa jáne kartografııa joǵary kolledji men respýblıkanyń basqa da oqý oryndarynan otyzdan astam stýdent qatysyp jatyr.

Sonymen qatar, munda tabylǵan artefaktilerdi zertteıtin jyljymaly zerthana da bar.