ShQO-daǵy órt: Senatorlar baspanasyz qalǵan turǵyndarǵa bir kúndik eńbekaqysyn aýdardy
Shyǵys Qazaqstan oblysynyń Rıdder qalasynda bolǵan alapat órttiń saldarynan ondaǵan úı tolyqtaı órtenip ketti. Ókinishke qaraı, qaıǵyly jaǵdaı adam ólimine ákelip soqty.
Osyǵan oraı Senat Tóraǵasy Máýlen Áshimbaev mundaı tótenshe jaǵdaı kezinde zardap shekkenderge qoldaý kórsetý úshin qoǵamnyń judyryqtaı jumylyp, birlesip áreket etýiniń mańyzy zor ekenin aıtty.
«Bul jaǵdaı Prezıdentimizdiń tikeleı baqylaýynda. Memlekettik organdar Rıdder turǵyndaryna barlyq qajetti kómekti kórsetedi. Bul óte qıyn jaǵdaı ekeni sózsiz. Osyndaı syn-saǵatta bárimiz birlesip, kómekke muqtaj azamattarǵa qoldaý kórsetýimiz kerek. Parlament Senatynyń jáne jeke óz atymnan órt saldarynan qaıtys bolǵan azamattyń jaqyndaryna qaıǵylaryna ortaqtasyp, kóńil aıtamyn. Sondaı-aq, zardap shekkenderdiń tezirek saýyǵyp ketýlerine tilektespiz», – dedi Máýlen Áshimbaev.
Parlament Senatynyń depýtattary bir kúndik eńbekaqylaryn tilsiz jaýdan zardap shekkenderdiń kómek qoryna aýdarý jóninde sheshim qabyldady.
Qazirgi tańda Memleket basshysynyń tapsyrmasyna sáıkes Úkimet pen Shyǵys Qazaqstan oblysynyń ákimdigi órtten zardap shekken qala turǵyndaryna kómek kórsetý jáne úısiz qalǵandardy baspanamen qamtamasyz etý jumystarymen aınalysyp jatyr
Esterińizge sala ketsek, buǵan deıin májilismender bir kúndik jalaqysyn Rıdderdegi órtten zardap shekkenderge aýdarǵan bolatyn.
Aıta keteıik, 10 mamyr kúni ShQO-daǵy Rıdder orman sharýashylyǵynda órt shyqty. Dala órti 310 gektar aýmaqty sharpyp, 1 adam qaza tapty. Órtke baılanysty shuǵyl jeli iske qosyldy.
Tótenshe jaǵdaılar mınıstrliginiń resmı ókili Talǵat Ýálı BAQ ókilderine Rıdder qalasynyń Leshoz kentindegi orman órtiniń alǵashqy yqtımal sebepterin atady.
QR Іshki ister mınıstrligi Shyǵys Qazaqstan oblysy Rıdder qalasyndaǵy órt faktisi boıynsha sotqa deıingi tergeýdi bastady.
Búgin Shyǵys Qazaqstan oblysynyń polıtsııa qyzmetkerleri alapat órtke qatysty kúdiktini ustady.
