ShQO-daǵy Altaı aýdanynyń ákimdigi ne sebepti Lenın eskertkishin jóndeýge qarajat bólgenin túsindirdi

ÓSKEMEN. QazAqparat – Shyǵys Qazaqstan oblysyndaǵy Altaı aýdanynyń ákimdigi ne sebepti Lenın eskertkishin jóndeýge qarajat bólingenin túsindirdi, dep habarlaıdy QazAqparat tilshisi.

Altaı qalasynda jóndelip jatqan Lenın eskertkishi qırap qalǵan bolatyn. Osyǵan baılanysty qazir polıtsııa tergeý júrgizip jatyr.

«Bıyl qala turǵyndarynyń ótinishi boıynsha Lenın eskertkishi turǵan ortalyq alańnyń tehnıkalyq jaǵdaıyna taldaý júrgizý úshin arnaıy jumys toby qurylǵan bolatyn. Onyń quramyna qoǵam ókilderi kirdi. Soǵan oraı ortalyq alań men eskertkishti abattandyrýǵa jáne aǵymdaǵy jóndeý jumystaryn júrgizýge aýdandyq bıýdjetten 1 mln 400 myń teńge bólinip, «Memlekettik satyp alý týraly» QR zańyna sáıkes konkýrs jarııalandy», - dep jaýap berdi aýdandyq ishki saıasat bólimi QazAqparat tilshisiniń saýalyna.

Úsh ret júrgizilgen konkýrstyq rásimderden soń merdiger kompanııa anyqtalǵan. Ol 15 tamyzda jumysqa kirisken. Eki kúnnen keıin Lenınniń eskertkishi qulap, qırap qaldy.