ShQO-daǵy TÚKSh bólimi áleýmettik osal sanattaǵy adamdarǵa qoqys tarıfine jeńildik jasamaǵan

ÓSKEMEN. KAZINFORM — Shyǵys Qazaqstan oblysynyń Prokýratýrasy Samar aýdandyq TÚKSh bóliminiń áleýmettik osal sanattaǵy adamdarǵa qoqys tarıfine jeńildik jasamaı kelgenin anyqtady. 

ShQO Prokýratýrasy baspasóz qyzmetiniń málimetine súıensek, Samar aýdanynda TÚKSh salasyndaǵy zańdylyqtyń saqtalýyna tekserý júrgizildi. Sonyń barysynda jergilikti atqarýshy organnyń Ekologııalyq kodeks talaptaryn buzǵany belgili boldy.

— TÚKSh bólimi 2013 jyldan beri qatty turmystyq qaldyqtardy jınaý, tasymaldaý, suryptaý jáne kómý tarıfin bekitý kezinde áleýmettik turǵyda osal sanattaǵy azamattarǵa tıesili 50%-dyq jeńildikti jasamaǵan. Osylaısha, eńbek ardagerleri, múmkindigi shekteýli balalardy tárbıelep otyrǵan otbasylar, kópbalaly analar qatty turmystyq qaldyqtardy shyǵarý qyzmetine artyq aqsha tólep keldi, — delingen aqparatta.

Qadaǵalaý aktisi boıynsha bul zań buzý joıylyp, aýdan máslıhatynyń sheshimimen tıisti shara qabyldandy. Sondaı-aq jasyna baılanysty zeınetkerlerge, II top múgedekterine 25% jeńildik berilip, Ekinshi dúnıejúzilik soǵys ardagerleri qaldyqtardy shyǵarý úshin tólem jasaýdan tolyqtaı bosatyldy.

Eske salsaq, osyǵan deıin ShQO-daǵy Shemonaıha qalasynda myńdaǵan úı 1 mamyrdan bastap gazsyz qalaıyn dep turǵany jaıly jazǵanbyz.