ShQO-daǵy kommýnaldyq salada 500-ge jýyq maman tapshy

ÓSKEMEN. KAZINFORM – Shyǵys Qazaqstan oblysynda áli kúnge deıin kommýnaldyq qyzmet salasyndaǵy maman tapshylyǵy sezilip otyr.

ShQO Energetıka jáne turǵyn úı-kommýnaldyq sharýashylyq basqarmasynyń málimetine súıensek, saladaǵy ártúrli mamandyqtar boıynsha 500-ge jýyq adam tapshy.

Ásirese jylýmen qamtamasyz etý, sýmen jabdyqtaý, káriz jáne qaldyqtardy kádege jaratý salalarynda kadr tapshylyǵy ótkir. Al eń kóp suranysqa ıe mamandyqtar - qazandyq mashınısteri, mehanıkter, júrgizýshiler, ınjenerlik-tehnıkalyq jumysshylar. Máselen, shtaty 3514 adamnan turatyn «Birikken energetıkalyq servıstik kompanııa» AQ-da jumysshylar sany - 3321 adam. Memlekettik kommýnaldyq mekemelerdegi 2808 shtattyń tek 2168-i tolyq. Osylaısha, tapshylyq 23 paıyzǵa jetken.

Bilikti mamandardy ustap qalý úshin oblysta 2024 jyldan bastap «Shyǵys Mamany» jeńildetilgen ıpotekalyq baǵdarlamasy iske qosyldy, onda 10% bastapqy jarna jáne 19 jylǵa deıingi jyldyq tıimdi mólsherleme 5% shartymen turǵyn úı satyp alý múmkindikteri qarastyrylǵan. Ótken jyly irikteý qorytyndysy boıynsha jylý-energetıka salasynyń 17 mamany úı satyp aldy.

- Baspanaly bolǵandar qatarynda qazandyq operatorlary men basqa da mamandar bar. Barlyǵy 52 adam ótinish bildirip, onyń 17-si irikteldi. Bul jumys Úkimet deńgeıinde baǵalanyp, ony respýblıka boıynsha engizý usynyldy, - deıdi ShQO Energetıka jáne turǵyn úı-kommýnaldyq sharýashylyq basqarmasynyń basshysy Nurlan Ramazanov.

2025 jyly baǵdarlama keńeıtilip, sýmen jabdyqtaý jáne káriz salasyndaǵy jumysshylar da qamtylmaq. Sol úshin oblystyq bıýdjetten 200 mln teńge bólinip, «Otbasy bankimen» kelisimge qol qoıyldy.

Jyl ótken saıyn jalaqynyń kóterilip, turǵyn úımen qamtamasyz etýdiń arqasynda mamandar tapshylyǵy birtindep azaıyp keledi.

Eske salsaq, osyǵan deıin aýyldardaǵy dáriger tapshylyǵy máselesi qalaı sheshilip jatqany jaıly jazǵanbyz.