ShQO-daǵy dáriger tapshylyǵy: aq halattylar aýyldan góri qalada jetispeıdi

ÓSKEMEN. KAZINFORM – Shyǵys Qazaqstan oblysynda birneshe qala bar. Sol qalalardaǵy aýrýhanalarda medıtsına qyzmetkerleri tapshy. Bul máseleni oblys deńgeıinde sheshý ońaıǵa soqpaı tur. Bas dárigerler osy jóninde mınıstrlikke úndeý jasady, dep habarlaıdy Kazinform agenttiginiń tilshisi.

Óńirde medıtsına qyzmetkerleri tapshylyǵy máselesi óte ózekti. 152 dáriger tapshy bolsa, onyń 114-i qalalarǵa kerek. Ásirese kadr jetispeýshiligi Óskemen, Rıdder, Shemonaıha, Altaı jáne Serebrıansk qalalarynda baıqalyp otyr. Naqty aıtqanda:

- Óskemende – 52

- Altaıda – 28

- Rıdderde – 10

- Shemonaıhada – 9 dáriger qajet.

- Bul másele bizdiń óńirde ǵana emes, respýblıka kóleminde ózekti. Buǵan qalalarda kótermeaqy nemese jeńildetilgen nesıelerdiń bolmaýy sebep. Al aýyldardy «Dıplommen aýylǵa» baǵdarlamasy qoldaıdy. Bul jas mamandardy tartýǵa kómektesedi. Sondyqtan da biz Densaýlyq saqtaý basqarmasyna jáne tıisti mınıstrlikke Altaı men Serebrıansk qalalarynda da osy baǵdarlamany engizýdi surap, hat jazdyq, - dedi Altaı aýdanaralyq aýrýhanasynyń bas dárigeri Oljas Nurıkenov.

«Dıplommen aýylǵa» baǵdarlamasynyń kadr tapshylyǵyn sheshýge sep bolyp kele jatqany ras. Qarasha aıynda Qaraǵandy qalasynan Altaı aýdanynyń Turǵusyn aýylyna jalpy tájirıbelik dáriger Ajar Asqarbekova kóship kelgen. Jas otbasyǵa birden qyzmettik úı berildi. Endi ol aýyl turǵyndaryna sapaly qyzmet kórsetip keledi.

«Dıplommen aýylǵa» baǵdarlamasynyń bizdiń aıaqqa turyp ketýimizge kómegi kóp boldy. Jumys izdeýdiń qajeti joq, jumys seni tosyp tur. Bul jaqta meni ǵana emes, joldasymdy da jumysqa ornalastyrdy. Balalardy balabaqshaǵa berdik. Ákimdikten 400 myń teńge kóleminde kótermeaqy beriledi. Osyndaı jaǵdaı jasalyp jatqanda nelikten aýylǵa kelip, turǵyndarǵa kómektespeske. Oǵan qosa zańǵa ózgeris engizilip, Densaýlyq saqtaý mınıstrligi bıylǵy jyldan bastap 8,5 mln teńge bóledi», - dedi Ajar Asqarbekova.

Rasymende sáýir aıynan bastap aýylǵa kóship kelgen asa tapshy mamandarǵa 100 AEK kóleminde bir rettik aqshalaı tólem beriledi. Shyǵys Qazaqstandaǵy 15 maman aldaǵy jeltoqsan aıynda osy tólemdi alady.

Qalalarda mundaı baǵdarlama joq. Sol sebepti aýdan ortalyǵyndaǵy aýrýhanalardaǵy kadr tapshylyǵy máselesi jyl sońyna deıin sheshilmeýi múmkin. Jalpy tájirıbelik dáriger, pedıatr, gınekolog, otolarıngolog, nevropatolog, anestezıolog pen reanımatolog, hırýrg, kardıolog, okýlıst jáne psıhıatr mamandary jetispeıdi. Jergilikti turǵyndar medıtsınalyq kómek alý úshin birneshe apta kútýge týra keletinin aıtady.

Aýrýhana basshylary mundaı olqylyqtyń ornyn toltyrý úshin aýdan ortalyqtarynda, shaǵyn qalalarda jumys isteýge jeńildikter qarastyrylýyn usynyp otyr. Bul máseleni oblys deńgeıinde sheshýdiń ártúrli ádisteri qarastyrylyp jatyr. Óskemende sońǵy 5 jylda medıtsınalyq qyzmetkerlerge 8 qyzmettik páter, 20 jeke turǵyn úı berilgen.

«Medıtsınalyq uıymdar óz qarajattary esebinen turǵyndardy oqyta bastady. Búginde 27 turǵyn medıtsınalyq mekemeler esebinen, 32 turǵyn jergilikti bıýdjet esebinen Semeı qalasynda bilim alýda. 2024 jyly 14 adam bilim alyp jatyr. Alaıda bul sharalar kadr tapshylyǵyn tolyqtaı jaba almaıdy. Bul mamandar bizge tek 2-3 jyldan keıin ǵana keldi, - deıdi ShQO Densaýlyq saqtaý basshysynyń orynbasary Aınash Kapanova.

Jas dárigerler qalalarda jumys istegisi keletindikterin jasyrmaıdy. Infraqurylymy damyǵan, jaıly jaǵdaı jasalǵan. Alaıda baspananyń bolýy – eń basty faktor.

«Óskemende jumys istegim keledi. Biraq ol jaqta baspanamen qamtamasyz etpeıdi. Páter jaldaǵan qymbat. Kótermeaqy da joq. Ózim shyǵysqazaqstandyq bolsam da, basqa oblystan túsken usynysqa kelistim», - dedi medıtsınalyq JOO-nyń túlegi Alına Erjanova.

Ázirge shaǵyn qalalardy alpaýyt óndiris orny «Kaztsınk» qutqaryp tur. Kásiporyn esebinen Altaı men Rıdder qalalaryndaǵy jas mamandarǵa 1 mıllıon teńge kótermeaqy, al Serebrıanskide 2 mıllıon teńge beriledi. Óńirdegi medıtsına qyzmetkerleri tıisti mınıstrlikter jumys istegisi keletin jas mamandarǵa qalalarda da jaǵdaı jasap, ótinishterin qaraýsyz qaldyrmas dep úmittenedi.

Osyǵan deıin vıtse-premer Tamara Dúısenovanyń ShQO jurtshylyǵymen densaýlyq saqtaýdy damytý máselelerin talqylaǵany týraly jazdyq.