ShQO-daǵy balabaqshada quramynda synap bar shamdar saqtalǵan

ÓSKEMEN. KAZINFORM – Shyǵys Qazaqstan oblysy Samar aýdanyndaǵy balabaqshada quramynda synap bar qaýipti shamdar saqtalyp, sanıtarlyq erejeler óreskel buzylǵan.

Samar aýdanynyń prokýratýrasy «Dánshik» balabaqshasynda sanıtarlyq erejelerdiń óreskel buzylǵandyǵyn anyqtady.

«Tekserý barysynda quramynda synap bar 22 lıýmınestsentti shamnyń balalarǵa qoljetimdi jerde saqtalyp, olardyń ómiri men densaýlyǵyna tikeleı qaýip tóndirgeni belgili boldy. Lıýmınestsentti shamnyń quramynda úsh-bes mıllıgramm synap bolady jáne onyń durys saqtalmaýy aýyr zardaptarǵa ákelip soǵýy múmkin. Sanıtarlyq ereje talaptaryna qaramastan, balabaqsha ákimshiligi bul qaýipti zattardy basqa jerge kóshirmegen, joımaǵan», - dep habarlady ShQO prokýratýrasynyń baspasóz qyzmeti.

Aýdan prokýratýrasynyń qadaǵalaý aktisi negizinde qaýipti materıaldardy áketý boıynsha mamandandyrylǵan uıymmen shart jasasyp, olardy joıý sharalary bastaldy.

Kináliler, onyń ishinde balabaqsha meńgerýshisi tártiptik jaýapkershilikke tartyldy.

Osyǵan deıin ShQO-daǵy sport mektepteriniń jattyqtyrýshylary jalǵan dıplom paıdalanǵanyn jazdyq.