ShQO-daǵy 89 bóget kúrdeli jóndeýdi qajet etedi

ÓSKEMEN. KAZINFORM – Shyǵys Qazaqstan oblysynda jaramsyz jáne jartylaı qıraǵan gıdrotehnıkalyq qurylystardy kezeń-kezeńimen paıdalanýdan shyǵarý jumystary bastaldy.

Talaı jyl boıy sý jınamaıtyn, biraq resmı túrde balansqa tirkelip, bıýdjet qarajatyn «jutyp» jatqan bógetter endi isten shyǵarylmaq. Bul jaıynda Ertis basseındik ınspektsııasynan málim etti.

Aımaqta mundaı keminde tórt nysan anyqtalǵan, onyń bireýi Samar aýdanynda, bireýi Glýbokoe aýdanynda jáne ekeýi Shemonaıha aýdanynda. Olardyń tehnıkalyq jaǵdaıy apatty dep tanylyp, qalpyna keltirý ekonomıkalyq turǵydan tıimsiz dep eseptelgen. ShQO Sybaılas jemqorlyqqa qarsy qyzmetiniń málimetinshe, atalǵan bógetterge jyl saıyn bólinetin qarjy is júzinde jelge ushyp jatty. Endi bul nysandar tolyǵymen paıdalanýdan shyǵarylýy tıis.

— Biz keıbir eski gıdrotehnıkalyq qurylystarǵa jyl saıyn qarajat bólingenin, biraq shyn máninde eshqandaı qyzmet kórsetilmegenin anyqtadyq. Tipti, olarda kópten beri sý jınalmaı kelgen. Sonymen qatar jumys istep turǵan kóptegen bóget qanaǵattanarlyqsyz jaǵdaıda jáne shuǵyl jóndeýdi qajet etedi, - dedi oblystyq Antıkor basshysy Denıs Shakenov.

Tekserý nátıjesinde óńir boıynsha tirkelgen 132 bógettiń 89-yna kúrdeli jóndeý qajet. Saraptama olardyń tozý deńgeıi 60-70%-ǵa jetkenin, keı jaǵdaıda 90%-ǵa deıin jaqyndaǵanyn kórsetti.

Soǵan qaramastan bul qurylystardyń basym bóligi aýyl sharýashylyǵy alqaptaryn sýmen qamtamasyz etip, sýarmaly eginshilikti damytýǵa jáne eldi mekenderdi tasqynnan qorǵaýǵa mańyzdy úles qosyp otyr. Mamandardyń aıtýynsha, osyndaı strategııalyq nysandar qarjylandyrý men baqylaýdyń basty basymdyǵy bolýǵa tıis.

Alaıda qazir jergilikti deńgeıde olardy kútip-ustaýǵa qajetti resýrs pen bilikti mamandar jetispeıdi. Aýdandyq ákimdikterde sý balansyn jáne tehnıkalyq jaǵdaıyn baqylap otyratyn gıdrotehnıka mamandary joqtyń qasy.

— Kóktemde qansha sý kelip jatqanyn, ol sýdyń qalaı jumsalyp jatqanyn eshkim dóp basyp aıta almaıdy. Mamandar da, baqylaý da joq. Sondyqtan biz keıbir nysandardy kásibı gıdrotehnıkalyq uıymnyń qaramaǵyna berýdi uıǵardyq. Olarda qajetti kadrlar men múmkindikter bar, - dedi Ertis basseındik ınspektsııasy basshysynyń orynbasary Ernar Mádı.

ıAǵnı, 24 gıdrotehnıkalyq nysan aýdan ákimdikteriniń balansynan alynyp, «Shyǵys sý qoımalary» kommýnaldyq kásipornyna berilmek. Kásiporynǵa ótkizý arqyly sý qoımalaryn ortalyqtandyrylǵan basqarý jolǵa qoıylyp, tehnıkalyq tekserýlerdi ýaqytyly júrgizý, qaýipke jedel áreket etý jáne sý resýrstaryn tıimdi bólý jumystary qamtamasyz etiledi dep josparlanyp otyr.

Eske salsaq, osyǵan deıin SQO-da bógetterdiń qurylysyna qatysqan kásipkerler tıisti aqshalaryn ala almaı júrgeni habarlanǵan.