ShQO-da jer qatynastary bóliminiń basshysyna 1,1 mln teńge aıyppul salyndy

Aımaqtaǵy Samar aýdanynda atqarýshy organ osy jyly jeke jáne zańdy tulǵalarǵa jer ýchaskelerin ýaqytsha paıdalaný boıynsha 16 baıqaýdy ótkizbegen, dep habarlaıdy Kazinform.

Jyl basynan beri ShQO prokýratýra organdary quny 690 mln teńgeni quraıtyn 40 myń ga 119 jer ýchaskesin memleket menshigine qaıtarǵan. Onyń ishinde jalpy quny 430 mln teńgeden asatyn 37 myń ga paıdalanylmaǵan 101 jaıylym ýchaskesi bar.

- Samar aýdanynyń prokýratýrasy ShQO kásipkerlik palatasymen birlesip jer zańnamasy normalarynyń saqtalýyna taldaý júrgizgen. Jergilikti atqarýshy organ osy jyly jeke jáne zańdy tulǵalarǵa jer ýchaskelerin ýaqytsha óteýli jer paıdalaný quqyǵyn berý boıynsha 16 konkýrs ótkizbegeni anyqtaldy, - dep málimdedi ShQO prokýratýrasy.

Aýdan prokýratýrasynyń qadaǵalaý aktisi boıynsha kórsetilgen buzýshylyqtarǵa jaýapty ákimdiktiń jer qatynastary bóliminiń basshysy Ákimshilik quqyq buzýshylyq týraly Kodekstiń 137-babymen jaýapkershilikke tartyldy. Samar aýdandyq sotynyń 27 qazandaǵy qaýlysymen oǵan 1,1 mıllıon teńge aıyppul túrinde ákimshilik jaza qoldanyldy.

Paıdalanylmaıtyn jerlerdi qaıtarý jumystary jalǵasýda.