ShQO-da jańa tanymdyq jýrnal jaryq kórdi
Jýrnaldyń alǵashqy sany 683 taralymmen jaryq kórip otyr. Qoınaýy tarıhqa toly Kókpekti óńiriniń ótkeni men búginin, el men jer shejiresin qamtyǵan jańa basylymda Shyǵystan shyqqan ádebıet ókilderiniń tyń týyndylary da turaqty basylmaq. Aıyna bir ret 24 betpen shyǵatyn túrli-tústi jýrnal jalpy oqyrmanǵa arnalǵan. Redaktsııanyń aqyldastar alqasyna Ashat Smaılov, jazýshy Rátbek Aryn, shejireshi Muhtarbek Kárimov, aqyn, jazýshy Nurjan Qýantaıuly, arheologııa isiniń bilgiri Erden Oralbaı sııaqty adamdar kiripti.
Kókpekti aýdandyq «Juldyz» gazeti redaktsııasynyń bazasynda daıyndalatyn jańa basylymnyń shyǵarý jumystaryna kókpektilik jas aqyn Darhan Berdibek basshylyq etpek.
«Basylym qoǵamdyq-tanymdyq jýrnal retinde tirkeldi. Oǵan shyǵatyn mazmundy maqalalar men tanymdyq materıaldar Qarash taýyndaǵy ańshylarǵa, Qaıyńdydaǵy ormanshylar men buǵyshylarǵa, Zaısandaǵy balyqshylarǵa, Baıbýra men Úmishtegi jolshylarǵa, Qoıtastaǵy kenshilerge, Jumbadaǵy omartashylarǵa, Eginbulaqtaǵy malshylarǵa rýhanı azyq bolady dep oılaımyz. Jastardy ólkeniń shejiresi men rýhanı álemine baýraý úshin jańasha aıdarlar júrgizemiz», - deıdi Darhan Berdibek.
