ShQO-da Jaqsylyq jáne Jarbulaq atty aýyldar paıda boldy

ÓSKEMEN. QazAqparat - ShQO-nyń Borodýlıha jáne Glýbokoe aýdandaryndaǵy keıbir eldimekenderdiń tarıhı ataýlary qaıtaryldy, dep habarlaıdy QazAqparat Altaynews-ke silteme jasap. 

Budan bylaı Romanovka aýyly - Jaqsylyq, Vtoraıa Pıatıletka - Jarbulaq dep atalatyn boldy. 

«Eldimekenniń baıyrǵy turǵyndarynyń aıtýynsha, Romanovka aýylynyń tarıhı ataýy Jaqsylyq eken. Al Vtoraıa Pıatıletka aýyly jardyń mańynda ornalasqan, al tómende bulaq aǵyp jatyr. Sondyqtan, aýyl turǵyndary Jarbulaq degen ataý usyndy. Bul ataý jaǵrapııalyq ornalasýy jaǵynan dóp keledi», - deıdi oblystyq tilderdi damytý jónindegi basqarmanyń onomastıkalyq jumys jáne taldaý bóliminiń basshysy Roza Tólemisova.

Sonymen qatar, aýyl aqsaqaldary Glýbokoe aýdanyndaǵy Frýnze aýyldyq okrýgynyń ataýyn Tarhan dep almastyrý týraly usynys aıtqan. Olardyń ózderi kóp jyldan beri osy ataýdy qoldanyp júrgen kórinedi. «Tarhan» túrki sózi, «salyq tóleýden bosatylǵan adam» nemese «erkin adam», «áskerı qolbasshy» degen sııaqty maǵynalardy bildiredi. Oblystyq qoǵamdyq keńestiń otyrysynda bul usynys ta qoldaý tapty.