ShQO-da zeınetke shyǵýy tıis 2 myńnan astam áıel qujattaryn áli ótkizbegen
«Bıyl 58 jasqa tolǵan 1959 jyly týǵan áıelderdiń zeınetkerlikke shyǵatyn mezgili keldi. Olar zeınetaqy taǵaıyndaý úshin Halyqqa qyzmet kórsetý ortalyqtaryna qujattaryn ótkizýleri tıis. Tipti jumys ótili tolyq bolmaǵan kúnde de, qujattaryn rásimdegenderi abzal. Al eger áıelder qujattaryn bıyl ázirlemese, 2018 jyldyń 1 qańtarynan keıin onyń zeınet jasyna alty aı qosylady», - dep túsindirdi Eńbek, áleýmettik damý jáne kóshi-qon komıtetiniń Shyǵys Qazaqstan oblysy boıynsha departamenti basshysynyń áleýmettik máseleler jónindegi orynbasary Marına Sharonova.
Departamenttiń málimetteri boıynsha, ústimizdegi jyly 58-ge tolǵan 2 myńnan astam áıel zeınetaqylaryn áli rásimdemegen.
«Buǵan qosa, zeınet jasyna jetkenimen, zeınetkerlik kýáligin almaǵandar qurmetti demalysqa shyqqandarǵa qarastyrylǵan áleýmettik jeńildikterdi paıdalana almaıdy. Mamandar áıel adamdardyń bul salǵyrttyǵyn túsine almaı dal. Bálkim keıbir jandar zeınetaqyny jasyna jetkennen keıin memlekettiń ózi taǵaıyndap beredi dep jańsaq oılaýy da múmkin. Ne bolmasa eńbek ótilim jetkiliksiz dep, qoldaryn bir silteýleri de ǵajap emes», - dep jazady saıt.
Marına Sharonovanyń sózine qaraǵanda, áıel adamnyń eńbek ótiline onyń balamen otyrǵan jyldary da kiredi. Ár balaǵa úsh jyldan esepteledi, biraq barlyq jıyntyq ýaqyt 12 jyldan aspaýy qajet. Sonymen qatar 1998 jylǵa deıin múgedek balany on alty jasyna deıin kútse, bul aralyq ta eńbek ótiline sanalady. Basshynyń orynbasary jyl aıaǵyna deıingi eki aıda zeınet jasyna ilikken áıelderdiń qujattaryn tezirek tapsyrýlaryn ótindi.
Áleýmettik tólemderdiń vedomstvoaralyq esepteý ortalyǵynda (burynǵy zeınetaqy tóleýdiń memlekettik ortalyǵy) qujattaryn rásimdemegen áıelderdiń tizimi jasalyp, olardyń árqaısysyna qajetti qujattardyń tizimi men HQKO-nyń mekenjaılary jazylǵan eskertý qaǵazdary jiberilgen.
«HQKO qujattardy zeınet jasyna on kún qalǵan kúnnen bastap qabyldaı beredi. Alaıda bolashaq zeınetker qaǵazdaryn retteýdi erterek bastaǵany durys. Bizdiń departament te, HQKO kez kelgen ýaqytta keńes berýge ázir», - dep tolyqtyrdy Marına Sharonova.