ShQO-da úzdik medıtsına qyzmetkerleri marapattaldy
Medıtsına qyzmetkerleri kúni qarsańynda Óskemende saltanatty shara ótti. Oblystyq máslıhat hatshysy Denıs Rypakov pen ShQO ákiminiń orynbasary Shákárim Buqtuǵutov úzdik aq halattylardy marapattady.
«Barlyq medıtsına qyzmetkerlerin kásibı merekelerimen shyn júrekten quttyqtaımyn. Sizder halqymyzdyń ómiri men densaýlyǵy úshin kúresip júrsizder. Osy rette, uzaq jyldar boıy qyzmet etip kele jatqan densaýlyq saqtaý salasynyń ardagerlerine erekshe alǵysymdy bildiremin», - dedi D.Rypakov.
Aq halattylar eren eńbegi úshin medaldarmen, Qurmet gramotalarymen, tósbelgilermen jáne Alǵys hattarmen marapattaldy.
«Eńbek ardageri» tósbelgisi Glýbokoe aýdandyq ortalyq aýrýhanasy perzenthana bóliminiń meńgerýshisi Lıýdmıla Logeıkoǵa, oblystyq ftızıopýlmonologııa ortalyǵynyń hırýrg dárigeri Saǵı Qojabaevqa, Rıdder qalalyq aýrýhanasynyń otolarıngology Serik Jamantaevqa berildi.
«Densaýlyq saqtaý isiniń úzdigi» jáne «Densaýlyq saqtaý isine qosqan úlesi úshin» tósbelgilerimen Óskemen qalalyq №2 emhanasynyń pýlmonolog dárigeri Olga Govorýhına, Borodýlıha aýdandyq aýrýhanasynyń otolarıngology Olga Mokroýsova, mamandandyrylǵan balalar úıiniń medbıkesi Maıra Sýleımenova, Kókpekti aýdandyq aýrýhanasynyń medbıkesi Almash Mamabaeva jáne Semeı qalasynyń juqpaly aýrýlar aýrýhanasynyń bólim meńgerýshisi Dáýlet Sekerbaev marapattaldy.
Aıta keteıik, sońǵy 5 jyl ishinde óńirdegi medıtsınalyq mekemelerge 36 mlrd teńgege halyqaralyq standarttarǵa sáıkes keletin 3 myńnan astam jabdyq satyp alynǵan. Bul joǵary tehnologııalyq medıtsınalyq tehnıka kólemin 2,5 esege ulǵaıtýǵa múmkindik berdi.