ShQO-da úıi órtenip jatqanda ákimdikke kelip boqtaı jónelgen adam 15 kúnge qamaldy

ÓSKEMEN. KAZINFORM – Shyǵys Qazaqstan oblysy Shemonaıha aýdanynda úıi órtenip jatqanda ákimdikke kelip qyzmetkerlerdi boqtaı jónelgen adam 15 kúnge qamaldy.

Shemonaıha aýdandyq sotynda qaralǵan is materıaldarynan belgili bolǵandaı, aýyl turǵynynyń úıinde órt shyqqan. Otpen áýeli ózi kúresken ol óshire almaı qalyp, aýyldyq okrýg ákimdigine júgirip kelgen. 

«Ákimdik qyzmetkerlerinen kómek suraǵanynda olar órt sóndirýshilerge habarlasý qajettigin aıtady. Buǵan ashýlanǵan adam boqtaı jónelip, aıqaı shyǵarǵan. Kóp uzamaı sol jerge polıtsııa qyzmetkerleri kelip jetip, oǵan qatysty is qozǵady», - delingen sot úkiminde. 

Sot sheshimimen usaq buzaqylyq jasaǵan er adam on bes táýlikke ákimshilik qamaqqa alyndy.