ShQO-da úlken kóne shahardyń orny tabyldy

ÓSKEMEN. QazAqparat - Besqaraǵaı aýdanynyń Jetijar aýyly mańynda ejelgi qalanyń orny tabyldy, dep habarlaıdy QazAqparat altaynews.kz silteme jasap. «Tarıhy tereń týǵan jer» ǵylymı-tájirıbelik konferentsııasynda pavlodarlyq arheolog Vıktor Merts osyndaı jańalyqpen bólisti.

Kerekýlik arheologtyń aıtýynsha, Besqaraǵaıdyń Jetijar óńirinde úlken eldi eken bolǵan eken. Ol qola dáýirine tıesili. Demek, aýyldyń tarıhy myńjyldyqtardyń qoınaýynda jatyr. Ejelgi protoqalashyq tipti ońtústik-batys Sibir aımaǵyndaǵy eń úlken arheologııalyq nysan bolyp esepteledi. Óıtkeni onyń aýmaǵy 100 gektardan asyp jyǵylady. Osyǵan qaraǵanda bul mańda aıtýly dáýirdiń astanasy ornalasýy múmkin degen boljam bar.

«Jetijar eldi mekenin zertteýdi 2000-shy jyldardyń basynda qolǵa aldyq. Qýanyshqa oraı, qazba jumystary júrgizilgen joq. Tek eskertkishtiń búlingen aımaqtarynan, sondaı-aq jerdiń joǵarǵy qabatynan materıaldar zertteýge alyndy. Nege deseńiz, bul nysan biregeıligimen erekshe. Qazba jumystaryn bastaý úshin geofızıkalyq zertteýdi júrgizýge týra keldi. Osy maqsatta Ulybrıtanııadan ǵalymdardy shaqyryp, jobaǵa tarttyq. Olarda qyzyǵyp ketti. Denıel Loýrens esimdi áriptesimiz, bıyl grant utyp osy jobaǵa atsalysty. Nátıjesinde arheologııalyq aýmaqtyń naqty ólshemi anyqtaldy. Ary ketse 70 gektar bolatyn shyǵar dep oıladyq. Alaıda eskertkishtiń alyp jatqan jeri 100 gektardan asyp ketti. Búginde bul tek Qazaqstandaǵy ǵana emes, sondaı-aq, búkil batys Sibirdegi arheologııalyq eskertkishterden anaǵurlym kólemdi nysan. Múmkin sol kezeńniń astanasy osynda bolýyda ǵajap emes», - dep naqtylady Vıktor Merts.

Ǵalym Jetijar eldimekenin aldaǵy ýaqytta qaıta jańǵyrtyp, ashyq aspan astyndaǵy murajaıǵa aınaldyrýǵa keletinine senimdi. Osy arqyly qasıetti jerdiń týrıstik áleýetin kúsheıtýge bolady deıdi tarıhshy.

Anyqtalǵandaı, kóne shahar Beǵazy-Dándibaı mádenıetine jatady.