ShQO-da túrmede jazasyn ótep shyqqandarǵa jan-jaqty qoldaý kórsetilip jatyr

ÓSKEMEN. QazAqparat – Shyǵys Qazaqstan oblysynda jazasyn ótep túrmeden shyqqandarǵa jan-jaqty qoldaý kórsetilýde, dep habarlaıdy QazAqparat tilshisi.

ShQO qoǵamdyq keńesiniń janynan bas bostandyǵynan aıyrý oryndarynan bosatylǵan adamdardy jáne Shyǵys Qazaqstan oblysynyń probatsııa, ıývenaldy polıtsııa qyzmetterinde esepte turǵan adamdardy áleýmettendirý máseleleri jónindegi komıtet qurylǵan bolatyn.

«Komıtet óz qyzmeti barysynda bas bostandyǵynan aıyrý oryndarynan bosap shyqqan azamattarǵa áleýmettik-psıhologııalyq jáne quqyqtyq kómek kórsetip, qujattaryn qalpyna keltirýge, jumysqa ornalasýǵa nemese járdemaqy alýǵa járdemdesýde. Bıyl biz Katonqaraǵaı, Altaı, Kúrshim, Zaısan, Jarma aýdandarynda bolyp, osy kategorııadaǵy azamattarǵa kóshpeli reıdter barysynda kómektestik», - deıdi komıtet jetekshisi Vıktor Dak.

Onyń aıtýynsha, jumyspen qamtý ortalyqtarymen tyǵyz jumys jolǵa qoıylǵan.

Sebebi túzetý mekemesinen bosatylǵandar qaıtara qylmysqa barmaýy úshin olardyń jumyspen qamtylýy asa mańyzdy. Ol úshin qujattary durys bolýy kerek.

Jyl basynan beri komıtet 7 otyrys, 9 reıd júrgizdi. Jeke ótinishi boıynsha 27 adamnyń máselesi sheshildi.

«Quqyqtyq qoǵam qurý úshin, keleshek urpaǵymyz úshin alańdamas úshin, jazasyn ótep shyqqan azamattardyń ómirin uıymdastyryp, áleýmettenýine yqpal etýimiz kerek. Bostandyǵy shektelgen azamattar túrmeden bosap shyqqan soń psıhologııalyq turǵydan bastap, kóptegen problemamen betpe-bet kezdesip jatady. Basqa adamdarǵa qarapaıym bolyp kórinetin HQKO arqyly qujat rásimdeýdiń ózi qıynǵa soǵady. Sondyqtan, azamattarǵa bul baǵytta tıisti kómek kórsetilýi tıis dep sanaımyz», - deıdi Vıktor Dak.