ShQO-da sý qubyry jarylyp, 6,5 myń adam sýsyz qaldy

Shyǵys Qazaqstan oblysy Ulan aýdanyndaǵy Qasym Qaısenov kentinde sý qubyry jarylyp, 6,5 myń adam sýsyz qaldy, dep habarlaıdy QazAqparat tilshisi.

Óńirlik Tótenshe jaǵdaılar departamentinen málim etkendeı, 30 qyrkúıek kúni saǵat 13:00-de Ulan aýdanynyń ortalyǵy Qasym Qaısenov kentinde sýyq sý qubyry jaryldy. 

«Barlyǵy 6,5 myńnan astam adam turatyn 32 kópqabatty úı jáne 68 túrli mekeme, onyń ishinde 4 bilim berý nysany ortalyqtandyrylǵan sýsyz qaldy. Qubyrdyń tym tozýynan osyndaı jaǵdaı boldy», - delingen aqparatta.

Ulan aýdanynyń ákimdigi turǵyndarǵa aýyzsýdy kestege saı jetkizip otyrýdy birden qolǵa alǵanyn aıtýda.

Apat ornynda «Molodejnyı» kommýnaldyq memlekettik kásiporny qalpyna keltirý jumystaryn júrgizip jatyr. Jóndeý jumystaryna barlyǵy 12 adam men 3 tehnıka jumyldyrylǵan.