ShQO-da sıntetıkalyq esirtki saýdasymen aınalysqan er adam ustaldy
ShQO Polıtsııa departamenti baspasóz qyzmetiniń málimetine súıensek, tártip saqshylary «Refleks» jedel-aldyn alý sharasy barysynda esirtki saýdalaǵan Óskemen qalasynyń 42 jastaǵy turǵynyn ustady. Ol psıhotroptyq zattardy klıentterge aldyn ala kelisilgen jerlerge tastap ketip otyrǵan.
Kúdiktiniń páterin tintý barysynda jasyl, qyzǵylt jáne aq tústi untaq pen 55 polımerli paket, ólsheýge arnalǵan elektrondy tarazy tárkilendi. Saraptama qorytyndysyna sáıkes, untaqtyń jalpy salmaǵy 119,9 gramdy quraıtyn pırrolıdınalerofenon psıhotroptyq zaty ekeni belgili boldy,- dedi oblystyq PD bastyǵy Saǵat Mádıev.
Qazirgi ýaqytta er adam ýaqytsha ustaý ızolıatoryna qamaldy. Atalǵan fakti boıynsha QR Qylmystyq Kodeksiniń 297-baby 3-bóligine sáıkes sotqa deıingi tergeý amaldary bastaldy. Kúdikti 15 jylǵa deıin bas bostandyǵynan aıyrylýy múmkin.
