ShQO-da pedagogterdi merzimdi basylymdarǵa májbúrlep jazdyrýǵa tyıym salynady

ÓSKEMEN. QazAqparat – Shyǵys Qazaqstan oblysynda pedagogterdi gazetter men jýrnaldarǵa májbúrlep jazdyrýǵa tyıym salynady. Muǵalim qandaı gazet nemese jýrnalǵa jazylýdy ózi sheshedi, dep habarlaıdy QazAqparat.

Aımaqtaǵy Bilim salasyndaǵy sapany qamtamasyz etý departamentiniń basshysy Zeınep Mahsýtovanyń aıtýynsha, «Pedagog mártebesi týraly» zańda ustazdardyń quqyqtary, áleýmettik kepildikter, shekteýler, mindetteri, sondaı-aq jaýapkershiligi belgilengen. Bıylǵy sáýirde osy normalardy iske asyrý úshin Bilim jáne ǵylym mınıstriniń arnaıy buıryǵy qabyldandy. Soǵan sáıkes bilim berýdi basqarý organdaryna jáne bilim berý uıymdaryna pedagogterdi laýazymdyq nusqaýlyqtarda kózdelmegen jumys túrlerine tartýǵa qatań tyıym salynǵan.

«Mysaly, oqý jyly aıaqtalyp, mektepterde jóndeý kezeńi jaqyndap keledi, onyń barysynda pedagogterdi jóndeý jumystaryna jıi tartady. Pedagogter júrgizýge mindetti qujattar tizbesinde kózdelmegen eseptilikti talap etýge, pedagogterdiń elektrondyq qujattardy basyp shyǵarýyna jol berilmeıdi. Sondaı-aq ákimdik tarapynan baspa basylymdaryna jazdyrý qajettigi týraly «tapsyrmalar« aýdandyq (qalalyq) bilim bóliminiń meńgerýshilerine, dırektorlarǵa, meńgerýshilerge túspeýge tıis», - dep atap ótti Zeınep Mahsýtova.