ShQO-da pandemııaǵa qaramastan kásipkerler sany 7% ósti

ÓSKEMEN. QazAqparat – Shyǵys Qazaqstan oblysynyń ákimi Danıal Ahmetov qala, aýdan ákimderin shaǵyn jáne orta bıznesti qoldaýǵa shaqyrdy, dep habarlaıdy QazAqparat tilshisi.

Óńirdiń qalalary men aýdandarynyń basshylary oblys ákimine aýmaqtardyń áleýmettik-ekonomıkalyq damýy jóninde jáne jergilikti kásipkerlerdi qoldaý máseleleri boıynsha esep berdi.

Danıal Ahmetov Shyǵys Qazaqstan oblysynda pandemııaǵa qaramastan, kóptegen salada kórsetkishterdiń óskenin aıryqsha atap ótti.

Ásirese bul ónerkásip pen aýyl sharýashylyǵyna qatysty. Sondaı-aq ınvestıtsııa men bıýdjetke túsetin salyqtyń kólemi de artqan.

«Pandemııaǵa qaramastan shaǵyn jáne orta bıznes sýbektileriniń sany 7%-ǵa óskeni qýantady. Óskemen, Kýrchatov, Rıdder qalalary men Jarma jáne Kúrshim aýdandarynyń ákimderine óńdeý ónerkásibi sektoryna erekshe nazar aýdarýdy tapsyrdym. Bul salada Semeı qalasy jaqsy kórsetkishke jetip otyr. Qalǵandary shıraq qımyldap, tabysqa jetýleri kerek. Statıstıkany taldap, ótken jyldan qalǵan jobalary bar kompanııalarǵa nazar aýdaryńyzdar», - dedi Danıal Ahmetov.

Talqyǵa salynǵan ekinshi taqyryp «Qarapaıym zattar ekonomıkasy» baǵdarlamasy arqyly shaǵyn jáne orta bıznesti qoldaýǵa qatysty boldy. Bul salada da jetistik bar.

Shyǵys Qazaqstan oblysynda qarapaıym zattar ekonomıkasynyń 270 jobasy bar.

Búginde onyń 210-y qarjylandyrylǵan. ShQO respýblıkada bul kórsetkish boıynsha besinshi orynda.

Ákimniń pikirinshe, alǵa jyljý dınamıkasy budan da jaqsy bolýy tıis.

Shemonaıha, Kúrshim, Kókpekti jáne basqa da birqatar aýdandar bul máselege jiti nazar aýdarýy kerek.

Aımaq basshysy olarǵa belsendi túrde jergilikti jerlerdegi kásipkerlerge túsindirý jumystaryn júrgizýdi tapsyrdy.

«Men óz isin damytqysy keletin birde-bir kásipker sýbsıdııadan bas tartpaıtynyna senimdimin. Olar qajet aqparatty ýaqytynda ári ońaı alýlary kerek. Sýbsıdııa – bul jumys istep turǵan bıznes úshin de, jańa ıdeıalar men startap-jobalar úshin de úlken kómek. Kóptegen azamattardyń oılary durys ári myqty ıdeıalary bar. Biraq olar sol ıdeıalary boıynsha bıznes-jospar daıyndap, odan ary alyp kete almaıdy. Bul jerde ákimder men kásipkerler palatasynyń aýdandyq fılıaldary olarǵa jol siltep, qoldaý kórsetýleri tıis. Aldaǵy ýaqytta ár ákimmen kezdesip, «Qarapaıym zattar ekonomıkasy» jobalaryn qorǵaý jóninde sóılesemin», - dedi Danıal Ahmetov.