ShQO-da ózenderdegi muz keptelisiniń aldyn alýǵa drondar kómektesedi

ÓSKEMEN. KAZINFORM – Shyǵys Qazaqstan oblysyndaǵy ózenderde muz keptelisiniń aldyn alýǵa drondar kómektesedi.

Oblys ózenge baı. Sondyqtan ondaǵy muz keptelýi sý deńgeıiniń kúrt kóterilýine ákelip soǵady.

Jyl saıyn osynyń aldyn alý úshin muzda jarylys jumystary júrgiziledi. Biraq bul ádis qorshaǵan ortaǵa, balyq resýrstaryna keri áserin tıgizedi. Onyń ústine bıýdjet shyǵynyn da talap etetini bar. Ótken jyly bul sharalarǵa 380 mln teńgedeı jumsalǵan.

Glýbokoe aýdanyna jumys saparymen barǵan ShQO ákimi Nurymbet Saqtaǵanov júk tasıtyn drondy ózenderde paıdalaný múmkindigin sóz etti.

Drondardy qoldaný tıimdirek ári qaýipsiz bolsa, onda osy tásilge kóshkenimiz jón dep esepteımin. Áýeli bárin zerdelep alýymyz kerek. Jaqyn kúnderi bul ádisti usynysqa engizińizder. Drondy muz qata bastaǵanǵa deıin satyp alýymyz qajet, - dep tapsyrdy aımaq basshysy.

Sarapshylardyń aıtýynsha, rasymen quny 32 mln teńge turatyn júk tasıtyn dron tıimdi sheshim. Ol tikushaq shyǵyndaryn azaıta otyryp, keptelisterdi boldyrmaýǵa jáne muz jaǵdaıyn baqylaýǵa múmkindik beredi.

Eske salsaq, buǵan deıin qostanaılyq oqýshy sý tasqyny kezinde kópirlerdi qıraýdan qorǵaıtyn qurylǵy ázirlegeni habarlanǵan.