ShQO-da «Óskemen tynysy» ekologııalyq qorǵaý bıýrosy ashylady

ÓSKEMEN. KAZINFORM – Óskemen qalasynda ekologııa jaǵdaıyn jaqsartý úshin arnaıy uıym qurylmaq.

Oblys ákimdiginde ótken jınalys barysynda Qoǵamdyq keńes janynan turaqty túrde jumys isteıtin «Óskemen tynysy» ekologııalyq qorǵaý bıýrosyn qurý máselesi talqylandy.

– Jańa uıymnyń maqsaty – aýa sapasyna qatysty qordalanǵan máselelerdiń sheshimin izdep, óskemendikterdiń ómir súrý sapasyn jaqsartý. Sondaı-aq, qalanyń ár aýdanynda atmosferaǵa monıtorıng jasaıtyn qurylǵylardy ornatý, ony kalıbrleý, kásiporyndardaǵy súzgini jaqsartý, qoldanystaǵy sharalardyń tıimdiligin baǵalaý, jańa usynystar ázirleý syndy jumystar atqarylady, – dep habarlady ShQO ákimdiginen.

Uıym turǵyndarǵa aýa lastanýynyń qaýip-qateri men ony azaıtýdyń joldaryn túsindirý úshin bilim berý baǵdarlamalaryn uıymdastyryp, ekologııalyq standarttardyń oryndalýyn baqylaýmen aınalysady.

Aımaq basshysy Ermek Kósherbaev «Óskemen tynysy» ekologııalyq qorǵaý bıýrosynyń jol kartasyn jasaýdan bastap, qalanyń ekologııalyq jobalaryn júzege asyrý jumystaryn jedeldetetinin aıtty.

– Qoǵamnyń, jergilikti atqarýshy organdardyń jáne tabıǵatty paıdalanýshylardyń ózara qarym-qatynasynyń tıimdi tetikteri qajet ekenin budan buryn da aıtqan edim. Ekobelsendiler memlekettik organdarmen, kásiporyndarmen dıalog ornatý arqyly máseleni sheshý joldaryn qarastyratyn bolady. Eń bastysy, qoǵamdyq baqylaý kúsheıtiledi. Qalanyń ár turǵyny osy uıymnyń zańdy ókili dep aıtýǵa negiz bar. Árıne, bári birden ózgerip ketpeıtini anyq. Biraq birlese otyryp, kezeń-kezeńimen qalaǵan nátıjege qol jetkizemiz, – dedi Ermek Kósherbaev.

Eske salsaq, osyǵan deıin Óskemende halyq tunshyǵyp, al sarapshylar aýa sapasynyń monıtorıngi sylbyr júrgiziletinin synaǵany habarlanǵan.